Krujë, mbeturinat digjen në mes të fshatit..dhe bashkia: S’kemi ç’bëjmë

Mbetjet urbane të qytetit të Krujës vazhdojnë të digjen në vend të hapur në anë të rrugës Krujë-Qafshtamë, konkretisht pranë vendit të quajtur Shkëmbi i Vajes.
Ato hidhen çdo ditë aty dhe më pas digjen duke rrezikuar shëndetin e qytetarëve, pasi tymrat dhe gazrat që çlirohen shpërndahen nga era duke ndotur ajrin e shumë fshatrave si dhe vetë lagjen “Abaze” që ndodhet në skajin verior të qytetit të Krujës.

Banorët e këtyre fshatrave thonë se janë të detyruar të mbajnë mbyllur dritaret për shkak të tymit dhe gazrave helmuese.
Shumë prej tyre shprehen se vuajnë nga sëmundje të frymëmarrjes. Po ashtu edhe prodhimet bujqësore janë të pakta në numër si pasojë e ndotjes.
Ndërkohë drejtues të bashkisë përgjigjen shkurt. “Nuk kemi vend tjeter ku t’i hedhim”.