Fshehin pasuritë, gjoba 35 deputetëve dhe zyrtarëve

 Deputetë dhe zyrtarë të administratës shqiptare nuk deklarojnë pasuritë e tyre para inspektoratit të kontrollit. Janë 35 ligjvënës dhe nëpunës të lartë të shtetit që janë gjobitur nga ILDKP sepse nuk kanë dorëzuar deklaratat e tyre të pasurisë. Ndërkohë, 217 zyrtarë nuk kanë dorëzuar dokumentet plotësuese.

Lista

Në listën e bërë publike nga Inspektoriati i Lartë i Deklarimit të Pasurisë rezultojnë se midis atyre që kanë refuzuar që të deklarojnë pasurinë janë edhe deputetë nga të dy krahët politikë, ndërsa pjesa dërrmuese e tyre janë pjesë e administratës tatimore. "Në përfundim edhe të këtij afati të dytë na rezulton se janë 35 subjekte të cilat për shkaqe të paarsyetuara nuk kanë dorëzuar deklaratën periodike në Inspektoriatin e Lartë Deklarime dhe Kontrolli Pasurive. Në zbatim të ligjit sektori i përgjithshëm vendosi marrjen e masës gjobë me 50 mijë lekë të reja për këto subjekte" tha Zana Xhuka, Inspektore e Përgjithshme e ILDKP-së. Kryeinspektorja akuzoi paraardhësin e saj se duhet të kishte bërë më shumë në drejtim të kontrollit të plotë të pasurisë së zyr-tarëve të lartë.

"Unë nuk po rishikoj, por kam gjetur kontrollin e plotë të papërfunduar. Janë dosje të cilat janë hapur në nëntor të vitit 2012, të cilat duhet të mbyllen për tre muaj. Në momentin që unë kam marrë detyrën dosjet kanë qenë të mbyllura", tha Zana Xhuka. Sipas këtij institucioni, subjektet deklarues deri më datën 31 mars 2013 janë 4670, pra 99.23% e zyrtarëve kanë përmbushur në kohë detyrimin e tyre ligjor. Mosdorëzimi i deklaratës së interesave private periodik/vjetor 2012, nga 4670 subjekte deklarues në total, gjatë procesit të përpunimit paraprak rezultoi me 85 zyrtarë. Drejtuesit e ILDKP-së thanë se subjektet u njoftuan në mënyrë shkresore kundrejt detyrimit të tyre ligjor për dorëzimin e deklaratës fizike në ILDKPK dhe me përfundimin e afatit të përcaktuar me ligj, 31 mars 2013 dhe të afatit të dytë në njoftimin shkresor, më datë 15 gusht 2013, rezulton se 35 subjekte nuk kanë dorëzuar deklaratën e interesave private periodik/ vjetor 2012. “Bazuar në ligjin “Për deklarimin dhe kontrollin e pasurive, të detyrimeve financiare të të zgjedhurve dhe të disa nëpunësve publikë” njoftojmë gjobitjen me 50.000 lekë të këtyre subjekteve për mosdorëzim të deklaratës së interesave private periodik/ vjetor 2012”, tha Inspektorja e Përgjithshme Zana Xhuka. Ndërkohë, duke ju referuar sërish deklarimit të pasurive, janë rreth 217 subjekte të cilat në bazë të ligjit kanë sjellë deklarimet e tyre, por nuk i kanë shoqëruar ato me dokumentacionin përkatës. Këtyre subjekteve u është dhënë edhe një mundësi tjetër për të sjellë dokumentet shoqëruese të deklaratave.

“Gjatë procesit të përpunimit paraprak, rezulton se nga një total prej 4670 subjektesh deklarues, 615 prej tyre kishin mungesë të dokumenteve justifikuese. ILDKPKI në përputhje me ligjin njoftoi në mënyrë zyrtare shkresore të gjithë subjektet e mësipërme. Në përfundimin e afatit të përcaktuar, rezulton se 217 subjekte nuk kanë dorëzuar dokumentet plotësuese. Inspektori i Përgjithshëm, ka vendosur se për subjektet e mësipërme, sanksioni ligjor gjobitje në masën 50.000 lekë deri në 100.000 lekë, kundrejt subjekteve pa dokumente justifikuese, do të zbatohet në përfundim të kontrollit aritmetiko logjik, duke lënë mundësinë e dërgesës së dokumenteve gjatë këtij procesi, duke qenë se ky është viti i parë i implementimit të kërkesave të reja ligjore”, sqaron ILDKP.

Dënimi

 35 zyrtarët që nuk deklaruan pasurinë

Janë gjithsej katër deputetë të parlamentit të kaluar të cilët nuk kanë deklaruar pasurinë e tyre për vitin 2012. Midis tyre bie në sy emri i Gjokë Uldedajt, i cili ka qenë në legjislaturën e kaluar deputet i Partisë Demokratike, ndërsa ka qenë edhe kreu i Dhomës së Tregtisë. Dy ditë më parë, Doganat sekuestruan 400 tonë karburante, sasi që do të hidhej në treg edhe pse ishte e plumbosur nga autoritetet doganore. Vlera e ngarkesës së bllokuar arrin në 4 miliardë lekë dhe ishte në pronësi të ADA Petrol, pronë Tonin Uldedajt, vëllai i ish-deputetit të PD-së në Shkodër, Gjok Uldedajt. Nga PD figuron një tjetër emër, Fatbardh Kadilli, ndërsa nga opozita janë dy deputetë, Enkelejda Shkreli dhe deputeti i ri Anduel Xhindi. Një tjetër emër i njohur është ai i zëvendësministres së Integirmit, Grida Shqina (Duma) , e cila ishte edhe kandidate e PD-së në zgjedhjet e 23 qershorit, por nuk arriti që të bëhej pjesë e parlamentit. Ndërkohë pjesa më e madhe janë punonjës të tatimeve dhe të doganave, duke filluar që nga inspektorët e deri tek drejtorët.

 Kontrolli i plotë

Subjektet detyrohen të deklarojnë në ILDKP pasuritë e paluajtshme dhe të drejtat reale mbi to; pasuritë e luajtshme, të regjistrueshme në regjistrat publikë; sendet me vlerë të veçantë mbi 500 000 lekë; të ardhurat personale për vitin, nga paga ose pjesëmarrja në borde, komisione ose çdo veprimtari tjetër që sjell të ardhura personale. Nuk deklarohen dhuratat ose trajtime preferenciale kur vlera e tyre është më e vogël se dhjetë mijë lekë, si dhe kur dy a më shumë dhurata ose trajtime preferenciale, të dhëna nga i njëjti person, së bashku, nuk kalojnë këtë vlerë, gjatë së njëjtës periudhë deklarimi. Për të gjithë zyrtarët që deklarojnë pasurinë pranë ILDKP ndiqet e njëjta procedurë ligjore për kontrollin e borxheve. Gjatë kontrollit të plotë, ILDKP zhvillon korrespondencë me të gjitha zyrat që administrojnë regjistra publikë (hipotekë-tatime-dogana- QKRQKL, banka të nivelit të dytë, institucione financiare jobankare, drejtorinë e përgjithshme të transportit rrugor, drejtorinë e përgjithshme të policisë, sistemin TIMS për hyrje- daljet nga territori i Shqipërisë, etj), për të verifikuar nëse përputhen asetet e deklaruara nga zyrtarët me gjendjen e tyre reale.

SHEKULLI