Festivali i dramës, 19 vepra shqipe do ngjiten në skenën e TK

Si  rrallë herë kur realizohen pjesë shqiptare, "Ëndrra e Ismail Qemalit" mbushi sallën e Teatrit Kombëtar. Ishte nata e parë e festivalit të Dramës Mbarëshqiptare, e cila ngriti siparin me këtë premierë. 
Festivali është konceptuar si një paradë ku do të ngjiten në skenë 19 vepra që do të flasin shqip. 100-vjetori i Pavarësisë u bë shkak që teatri të kthejë kokën pikërisht nga veprat shqiptare.

"Ëndrra e Ismail Qemalit" është vepra që fitoi çmimin e parë të konkursit të dramës zhvilluar pak muaj më parë. E shkruar nga Bashkim Kozeli dhe me regji të Spiro Dunit, drama përcolli për publikun një rrëfim të Ismail Qemalit pas shpalljes së Pavarësisë dhe pak përpara se të ndahej nga jeta. 

Pjesa ishte ndërtuar në bazë të një interviste dhënë për një gazetar amerikan dhe vegimve që flasin për momentet më të rëndësishme të njeriut që solli Pavarësinë e Shqipërisë. Në rolet kryesore Fatos Sela, Roland Trebicka, Bujar Asqeriu e Alfred Bualjoti.

Mes trupave që do të ngjiten në skenë për dhjetë ditë më radhë, janë teatrot e Durrësit, Elbasanit, Korçës, Shkodrës, Vlorës, Fierit, Gjakovës, Tetovës, Shkupit, por edhe trupa të tjera profesioniste. 

Albanian Screen