Dy kompani ndërkombëtare për auditimin

“Deloitte & Touche” dhe “Crown Agent” interesohen për borxhin, doganat e tatimet

Herion Mesi

Plani i qeverisë Rama për auditimin ndërkombëtar të financave të vendit ka ngjallur interesimin e disa nga shoqërive prestigjioze ndërkombëtare të auditit. Gjatë këtyre ditëve, mësohet se aktualisht dy janë kompanitë që kanë depozituar pranë Ministrisë së Financave kërkesën e tyre për auditimin e borxhit që qeveria u detyrohet të tretëve. Nga Ministria e Financave, mësohet se kompania “Deloitte & Touche”, ka bërë kërkesë për auditimin e borxhit, ndërsa kompania “Crown Agent” ka depozituar kërkesë për asistencën e tatimeve e doganave. Ndërkohë, përzgjedhja e këtyre kompanive të huaja që do të ngarkohen nga qeveria shqiptare për të bërë auditimin e borxhit ende nuk është mbyllur, pasi komisioni i posaçëm i ngritur nga qeveria, është në pritje të ofertave të tjera të kompanive të interesuara.

Auditimi

Qeveria “Rama” ka vendosur të ngrejë një grup pune për shërbimin e auditimit të borxhit të krijuar, që institucionet shtetërore u kanë subjekteve vendase apo të huaja për shërbimet e kryera, si dhe për shërbimin e asistencës në fushën e doganave dhe tatimeve. Por, pavarësisht faktit se në vend ka disa struktura auditimi, duke nisur nga Kontrolli i Lartë i Shtetit, qeveria e re thekson se ato nuk kanë kapacitetet dhe eksperiencën e duhur profesionale për të realizuar një proces të tillë. Ndërkohë, të huajt, theksojnë se socialistët do të jenë më të paanshëm në këtë proces. Sipas tyre, ky auditim do t’i shërbejë njohjes reale me situatën ekonomike në vend dhe raporteve të shtetit me paranë publike e private. Një tjetër angazhim i qeverisë së re është të çlirojë tatimpaguesit e mëdhenj nga kontrolli tatimor dhe realizimin e vetëkontrollit të tyre përmes këtij auditi. “Një auditim që të bëhet nga një prej katër kompanive të mëdha të auditimit dhe që ne shpresojmë të na sjellë më në fund pasqyrën reale të ekonomisë sonë dhe të raporteve të shtetit me paranë publike dhe me atë private. Ne duam ta çlirojmë sipërmarrjen e madhe, të paktën 1000 tatimpaguesit më të mëdhenj nga kontrolli tatimor. Ne nuk duam ta kontrollojmë më sipërmarrjen e madhe, ne duam që sipërmarrja e madhe të vetëkontrollohet përmes auditit nga katër kompanitë e mëdha”, do të theksonte Kryeministri Edi Rama në seminarin e nivelit të lartë “Forcimi i lidhjeve në Europën Juglindore” që u organizua pak ditë më parë nga Banka e Shqipërisë.

Kompanitë e auditimit

Deri pasditen e djeshme, në Ministrinë e Financave dhe qeverinë shqiptare kanë shprehur interesimin e tyre kompanitë ndërkombëtare “Deloitte & Touche” dhe “Crown Agent”. Të dyja këto kompani ndërkombëtare i kanë shprehur Kryeministrit Rama interesin e tyre që të asistojnë qeverinë për auditimin e borxheve që shteti u ka kompanive, të cilat kanë kryer punë publike, si dhe për shërbimin e asistencës në fushën e doganave dhe tatimeve. Kompania “Deloitte & Touche” është kompani e njohur për publikun shqiptar, pasi ajo ishte kompania e kontraktuar nga qeveria Nano në vitin 1997 për kryer auditimin e financave të firmave piramidale. Ndërkohë që kompania tjetër, “Crown Agent”, është pajtuar edhe nga qeveria e mëparshme “Berisha” për procese të ndryshme arbitrazhi. Ndërkohë, burime nga Financat theksuan se po hartohen dhe kontratat me kompanitë që do të ngarkohen nga shteti shqiptar, ku do të përcaktohen dhe kriteret e pagesës së këtyre kompanive dhe kostot reale të këtij projekti, që Kryeministri Rama e konsideron tepër të domosdoshëm për financat e shtetit shqiptar në të ardhmen.

box

Situata

Pak ditë më parë, ministri i Financave, Shkëlqim Cani, iu bashkua mendimit të FMN-së, se situata makroekonomike dhe financiare është kritike, e rëndë

Të ardhurat

Për tetë muajt e vitit 2013, të ardhurat totale në buxhet arritën 210.5 miliardë lekë ose 7.2% më pak se parashikimi i buxhetit për periudhën dhe 3.8% më pak se e njëjta periudhë e një viti më parë. Deri në fund të vitit, pritet të mblidhen rreth 320 miliardë lekë të ardhura në buxhet, ose 23.7% e PBB-së, rënie kjo e nivelit të të ardhurave ndër më të fortat në dy dekadat e fundit.

Borxhi publik

Borxhi publik i pritshëm në fundvitin e 2013-s nuk do të jetë 64%, sa u premtua nga qeveria e mëparshme, por mbi 67%, pa përfshirë borxhin e fshehtë. Nëse përfshihet në llogaritje edhe një pjesë e borxhit të fshehtë (pjesa e detyrimeve ndaj biznesit, i vlerësuar paraprakisht, së bashku me FMN-në, në afro 55-60 miliardë lekë), atëherë borxhi publik arrin në fundin e 2013-s jo më pak se 71%.

Shqip