Cameron: Zgjedhjet e qershorit në Greqi, një referendum

"Kryeministri britanik, David Cameron beson se zgjedhjet greke duhet të shihen si një referendum për anëtarësinë e Greqisë në eurozonë",-thonë burime të afërta me të. Edhe publikisht, Cameron i tha samitit të NATO-s në Chicago se qytetarët në Greqi duhet të kenë një mesazh të qartë se me anë të votës së 17 qershorit do të reflektojnë opinionin e tyre për euron. Cameron bëhet kështu i dyti lider i Bashkimit Europian që sugjeron referendum për euron përmes zgjedhjeve në Greqi, pasi kancelarja gjermane e kishte ideuar një gjë të tillë ditë më parë përmes një bisede telefonike me presidentin grek, Karolos Papulias. 

Edhe pse kabineti i kancelares e mohoi më vonë propozimin, në Greqi janë hapur debate të forta dhe politikanët gjithnjë e më shumë po e shohin 17 qershorin si caktimin e fatit të vendit në eurozonë. Në një analizë të BBC-së, thuhet se Qeveria në Londër i druhet mundësisë se nëse zgjedhjet e 17 qershorit në Greqi nuk prodhojnë një vendim për krizën, komplikacionet për pjesën tjetër të eurozonës, dhe ekonominë globale, do të jenë shumë më të thella.

Cameron paralajmëroi gjithashtu, se vendet e eurozonës duhet të përgatiten me vendosmëri për një dalje e mundshme të Greqisë nga eurozona. Një opinion i tillë po rritet në Britaninë e Madhe, ekonomia e së cilës do të vuajë pasojat e krizës së eurozonës, edhe pse nuk është anëtare e saj. Samiti i G8 në Camp David, edhe pse apeloi, për nxitjen e rritjes ekonomike në Evropë, paralelisht me masat shtrënguese, nuk solli ndonjë vendim konkret. Hapat e mëpasshëm pritet të merren në samitin e Liderëve të BE-së gjatë kësaj jave në Bruksel.

Albanian Screen