Blair në Tiranë, pritet të shpallë planin e këshillimit

Ish-kryeministri Tony Blair vjen ka mbërritur në Tiranë, ku do të ketë takime me zyrtarët e lartë të qeverisë shqiptare, duke filluar që nga kreu i ekzekutivit, Edi Rama. 

Britaniku Blair është konsulenti zyrtar i Qeverisë shqiptare. Kontrata me kompaninë e tij, “Goverment Adivisory Practice” u nënshkrua në muajin korrik të këtij viti, para zgjedhjeve parlamentare të 23 qershorit. 

Tony Blair do të japë intervistë televizive në “Top Channel”, në emisionin e të enjtes mbrëma të gazetarit Sokol Balla në “Top Story”. 

Blair ishte i pranishëm në Nju Jork, kur Kryeministri Rama zhvilloi takimin me presidentin e Bankës Botërore, Jim Yong Kim, në datën 23 shtator. Ai ishte ndërmjetësi i këtij ballafaqimi. Ish-kryeministri britanik, Blair, e konsideroi si të shkëlqyer takimin që Rama zhvilloi me presidentin e Bankës Botërore. Ai theksoi se Shqipërinë e presin përpara sfida shumë të rëndësishme dhe se mbështetja e Bankës Botërore është tepër e rëndësishme në një moment të tillë. “Patëm një takim të shkëlqyer sot me Kryeministrin Rama dhe me Bankën Botërore, për të parë sesi mund ta ndihmojmë qeverinë e re shqiptare për të sjellë ndryshimin që duan të shohin njerëzit në Shqipëri. Vendin e presin sfida të mëdha dhe ka shumë punë për të bërë. Kryeministri ka një program mjaft energjik e të vendosur dhe mendoj se fakti që presidenti i Bankës Botërore ka ardhur për ta takuar atë dhe për t’i thënë se kemi për t’i dhënë mbështetjen tonë të plotë Shqipërisë, na jep shpresë dhe diçka me të cilën mund të punojmë në të ardhmen. Mendoj se takimi ishte i shkëlqyer, konstruktiv, shumë i rëndësishëm”, theksoi Blair. Ndërsa në këtë takim, është konkretizuar nisja e një projekti pilot me Bankën Botërore, i cili ka qenë fryti i këtij takimi të zhvilluar në Nju Jork. Vetë Kryeministri shqiptar u shpreh optimist për mbështetjen e bankës në kuadër të një projekti pilot. Ky projekt do të mundësojë ngritjen e një zyre në Kryeministri, e cila ka si qëllim përkthimin e programit të PS-së në rezultate konkrete. Sipas tij, kjo nismë do të përfshinte në mënyrë të drejtpërdrejtë edhe ish-kryeministrin britanik, Tony Blair. Kompania e ish-kryeministrit britanik, sipas mediave të huaja, këshillon dhe 4 qeveri të tjera, atë të Brazilit, Kolumbisë, Kazakistanit dhe Kuvajtit.

TOP CHANNEL