Berisha: Rama mendon për pallatet dhe sarajet e tij, PD mendon për ju. S’do e gëzojë pushtetin sa të jeni ju

Kryeministri Sali Berisha duke folur në festimet për 22-vjetorit të krijimit të PD-së në Elbasan, theksoi se PD-ja kremton krenare këtë festë pasi falë qeverisjes së saj të suksesshme  vendi pati arritje të mëdha.

“Ne sot kremtojmë së bashku ditën që ne të gjithë së bashku u shndërruam nga njerëzit e shtypur në njerëz të lirë duke dëshmuam se ne jemi ndryshimi. Ne jemi ndryshimi sepse ne me kurajën dhe guximin tonë përmbysëm diktaturën e egër komuniste dhe e shndërruam Shqipërinë në vendin e lirisë dhe të drejtave të njeriut. Sot jemi vendi i respektimit të plotë të lirive dhe të drejtave njerëzore. Ne jemi ndryshimi- përpara. Pasioni ynë është liria dhe konsolidimi i saj”, tha Berisha.

Kreu i qeverisë theksoi më tej se në zgjedhjet e 23 qershorit, Partia Demokratike do të fitojë duke shembur kështu edhe murin e bllokimit.

“Ne festojmë sot krenar se ne jemi ndryshimi pasi ne që shembën Murin e Berlinit, më 23 qershor do të shembim murin e bllokimit. Ne jemi ndryshimi dhe për ne interesat e qytetarëve janë interesat e para”, tha Berisha.

Berisha akuzoi kreun e PS-së se interesohet vetëm për pallatet e familjarëve të tij dhe pasuritë e tij, ndërkohë që PD ka në qendër qytetarin dhe shqetësimet e tij.

“Tjetri e ka mendjen te pallatet e familjes, rezidencat në Dajt, pronat e familjes, i themi se edhe mund te ndërtosh duke favorizuar leje, por ne kasafortën e partisë nuk mund t’i fshehësh kurrë ato. Ai shoku bën gjithçka tu tatojë ju, ai do që shqiptarët të punojnë për pushtetin e tij, që s’do e gëzojë kurrë sa të jeni ju”, tha Berisha.

Ndërsa ka kërkuar votën e qytetarëve në zgjedhjet e 23 qershorit, kryeministri Berisha premtoi se vitet që vijnë PD-ja do të bëjë të mundur anëtarësimin e vendit në Bashkimin Europian.

“Kërkojmë votën për 4-vjeçarin tjetër për ta bërë Shqipërinë vendin të zhvilluar, për ta integruar Shqipërinë në Europë. Në këto 6 vite ne ia dolëm që Shqipëria të vlerësohet me vendet e zhvilluara. Ne kërkojmë votën tuaj për të ecur përpara drejt Euopës. Europa është projekti ynë, zotimi ynë që ne do ta bëjmë realitet vitet që vijnë”, shtoi Berisha.

   TEMA