Berisha i ankohet Haradinajt për PS-në: Erdhi në pushtet me premtime të parealizueshme

Kryeministri në largim, Sali Berisha, është takuar gjatë ditës së sotme me kryetarin e Partisë Aleanca për Ardhmërinë e Kosovës, Ramush Haradinaj. Gjatë këtij takimi, Berisha ka thënë se të gjitha arritjet e Shqipërisë, janë të lidhura me emrin e PD-së. Ai i është ankuar Haradinajt se PS erdhi në pushtet përmes premtimeve të parealizueshme.

“Zoti Haradinaj vlerësoi lart kontributin e Kryeministrit Berisha dhe mazhorancës së udhëhequr prej tij në demokratizimin dhe zhvillimin e Shqipërisë. Nga ana e tij, Kryeministri Berisha theksoi se të gjitha arritjet e mëdha të Shqipërisë në kuadrin e integrimeve euro – atlantike lidhen vetëm me Partinë Demokratike, duke theksuar se një asimetri e tillë tregon mungesën e vullnetit të Partisë Socialiste, e reflektuar kjo në sjelljen destruktive të opozitës gjatë 4 viteve të shkuara, kur ajo bllokoi integrimin europian të Shqipërisë. Kryeministri nënvizoi se alternanca është ligjësi themelore e demokracisë, por ai theksoi se Partia Socialiste erdhi në pushtet përmes premtimesh të parealizueshme, prej të cilave që tani PS po tërhiqet”, thuhet në një njoftim të Kryeministrisë.

Sipas njoftimit, Berisha ka garantuar Haradinajn, se edhe Kosova do të përfitojë nga projekti i TAP-it.

“Në takim u bisedua në lidhje me zhvillimet politike në planin e brendshëm dhe atë ndërkombëtar të Kosovës. Vend të veçantë zuri procesi i zbatimit të marrëveshjeve midis Republikës së Kosovës dhe asaj të Serbisë, ku u theksua rëndësia themelore e zbatimit të tyre për konsolidimin jo vetëm të Kosovës por dhe të paqes dhe stabilitetit në rajon. Në këtë kuadër, zoti Haradinaj theksoi se ky proces do të vazhdojë të ecë përpara.

Gjithashtu bashkëbiseduesit trajtuan tema të interesit të bashkëpunimit reciprok në fushën e ekonomisë, energjetikës, infrastrukturës etj.. Në këtë aspekt, zoti Haradinaj tregoi interes të posaçëm në lidhje me projektin TAP dhe mundësitë e Kosovës për të përfituar nga ky projekt energjetik madhor trans-europian. Kryeministri u shpreh se projekti TAP ka një rëndësi strategjike për sigurinë energjetike jo vetëm të Europës, por edhe të rajonit dhe siguroi se Kosova do të përfitojë në këtë kuadër. Me interes u trajtuan dhe temat e zhvillimit të infrastrukturës së përbashkët energjetike dhe shfrytëzimit të resurseve për prodhimin e energjisë në të dy vendet. Zoti Haradinaj çmoi projektet e mëdha të infrastrukturës të realizuara nga Kryeministri Berisha si një kontribut të jashtëzakonshëm për të sjellë shqiptarët së bashku dhe shprehu shpresën se këto projekte të nisura dhe reformat e ndërmarra nuk do të ndërpriten.

Kryeministri Berisha shtroi një drekë për nder të zotit Haradinaj dhe delegacionit që e shoqëronte”, përfundon njoftimi./b.l

TEMA