Avokati i Popullit: Tekstet shkollore diskriminuese ndaj LGBT, të rishikohen

Institucioni i Avokatit të Popullit ka tërhequr vëmendjen sot ndaj teksteve shkollore që përmbajnë terminologji diskriminuese ndaj komunitetit LGBT. 

Në një konferencë për shtyp, zëdhënësja e këtij institucioni, Elona Demollari tha se “Avokati i Popullit u njoh nëpërmjet Ambasadës Pink dhe LGBT Pro Shqipëri, me shqetësimin mbi disa tekste mësimore në Fakultetin e Drejtësisë dhe atë të Mjekësisë të Universitetit të Tiranës, të cilët përmbajnë elemente dhe përkufizime jo shkencor dhe diskriminues për komunitetin LGBT”. 

Avokati i Popullit rikujton se në rekomandimin e 2010 të Komitetit të Ministrave të Këshillit të Evropës, nënvizohet se lëndët mësimore nuk duhet të përmbajnë tekste të njëanshme, diskriminuese dhe denigruese ndaj komunitetit LGBT. 

“Procesi i Integrimit Europian të Shqipërisë dhe në mënyrë të vecçantë, marrja e statusit kandidat përveç të tjerave në Prioritetin 11 kërkon, që të bëhen hapa konkretë në forcimin e mbrojtjen e të drejtave të njeriut si dhe në zbatimin e efektshëm të politikave anti-diskriminim”, citon më tej zëdhënsasja Demollari. 

Duke theksuar se Shqipëria ka tashmë një kuadër legjislativ dhe institucional të përparuar në luftën kundër diskriminimit të gjithfarëllojshëm, Avokati i Popullit është i bindur se ka ardhur koha për zbatim efektiv të ligjit dhe rezultate konkrete dhe të prekshme në zbatim të politikave anti-diskriminim. 

“Qeverisë Shqiptare, të gjitha institucioneve të tjera shtetërore, enteve publike dhe private që kryejnë një funksion publik apo japin një shërbim publik që: Të marrin të gjitha masat e nevojshme dhe të menjëherërshme për zbatimin e legjislacionit në fuqi kundër diskriminimit”. 
Më tej Avokati i Popullit i kërkon në mënyrë të veçantë Ministrisë së Arsimit dhe Rektorëve të Universiteteve publike dhe private të rishikojnë programet dhe materialet mësimore, për të siguruar se lëndët mësimore nuk do të përmbajnë tekste të njëanshme, diskriminuese dhe denigruese ndaj komunitetit LGBT, - por do të respektojnë parimet e sipërcituara. 

Avokati i Popullit bëri të ditur se do të dërgojë brenda ditës së hënë një Rekomandim të posaçëm për këtë çështje Ministrisë së Arsimit, Rektorëve të Universiteteve Publik dhe Privatë dhe do të monitorojë nga afër zbatimin e këtij rekomandimi dhe në përgjithësi të legjislacionit anti-diskriminim ndaj këtyre strukturave. 

Me këtë rast, Avokati i Popullit i kërkoi edhe Kuvendit dhe komisioneve parlamentare të diskutojnë sa më shpejt raportin e Avokatit të Popullit me temë “Të drejtat e personave LGBT”, të dorëzuar në Kuvend në datë 05. shtator 2012. 

Në raportin social dhe ligjor mbi diskriminimin me bazë orientimin seksual dhe identitetin gjinor të Këshillit të Evropës, i cili mbulon 47 vende anëtare, Shqipëria renditet në listën e vendeve që kanë shkallë të lartë të homofobisë. 

Ballkanweb.com