Zgjedhjet, Basha 200 mijë vota më pak se Berisha në 2013, Rama humbet 300 mijë vota në dy vjet

Sipas një llogarite të bërë nga gazeta “Sot”, vota politike e 21 Qershorit ka shembur PD-në me 200 mijë vota më pak se në 2013, ndërsa PS-ja humbet 300 mijë vota në dy vjet. Sipas “Sot” në drejtimin e kryetarit të ri, Lulzim Basha, partia më e madhe në opozitë, jo vetëm nuk e ka përmirësuar rezultatin në zgjedhjet e 23 Qershorit 2013, por e ka përgjysmuar këtë rezultat. Duke iu referuar shifrave zyrtare të KQZ-së, në zgjedhjet parlamentare të 2013, Partia Demokratike, si subjekt politik, në rang kombëtar ka marrë 528 373 vota ose 30.63%. Si koalicion, në zgjedhjet e 2013, PD ka marrë 680 677, gati 300 mijë vota më pak se e majta. Ndërkaq, në zgjedhjet lokale të 2015, Partia Demokratike, votë politik në rang kombëtar, sipas projeksioneve të gazetës “Sot”, merr 305 mijë vota ose 20%. Teksa kutitë e numëruara të votimit për këshillat bashkiakë janë drejt fundit, rezultati i Partisë Demokratike është konsoliduar tek rreth 19-20 % të votave, duke shënuar një rekord që nga themelimi i saj. Pra, në zgjedhjet lokale të 2015, Lulzim Bashës i mungojnë rreth 200 mijë vota, krahasuar me rezultatin në zgjedhjet e 23 Qershorit 2013, kur partia udhëhiqej nga Sali Berisha. Ky rezultat nuk konfirmon rritjen dhe ringritjen e Partisë Demokratike gjatë dy viteve të fundit.

Por, një rënie të konsiderueshme, madje edhe më të madhe se PD në numra, ka pësuar edhe Partia Socialiste. Rezultati i deritanishëm dhe të dhënat rreth zgjedhjeve lokale të 21 Qershorit janë një sinjal dhe shenjë e zymtë për qeverinë “Rama” dhe Partinë Socialiste. Në zgjedhjet parlamentare të vitit 2013, Partia Socialiste, si parti, ka marrë në rang kombëtar 713 407 vota, përthyer në përqind 41, 36%. Ndërkaq, në zgjedhjet e 21 Qershorit 2015, edhe pse ka fituar shumicën e bashkive, Partia Socialiste, sipas projeksioneve merr 300 mijë vota më pak. Konkretisht, nga numërimi i deritanishëm i votave për këshillat bashkiakë Partia Socialiste merr 416 mijë vota ose 26,79%. Rënia e Partisë Socialiste gjatë dy viteve të fundit, siç edhe shihet nga shifrat zyrtare të KQZ, ka pësuar një rënie të frikshme.