Vizita më e dhimbshme në 10 muaj detyrë, - thotë Totozani te grevistët dhe shton për policinë: Ka kryer vepër penale

Avokati i Popullit, Igli Totozani ka vizituar pasditen e së shtunës ish-të përndjekurit në grevë urie. Në një prononcim për mediat në përfundim të vizitës, Totozani e ka vlerësuar situatën e grevistëve si tepër të rëndë, për faktin se atyre nuk u lejohen lëngjet, serumet dhe ilaçet. Më poshtë, prononcimi i tij për mediat sipas TCH:

“Për disa ditë unë mbush 10 muaj si Avokat i Popullit. Mund t’ju them se kam parë shumë gjatë këtyre 10 muajve. Kam pasur të bëj me problematika nga më të ndryshmet, por vizitë më të vështirë dhe më të dhimbshme sesa kjo e sotmja nuk kam pasur. Kjo vizitë më bind që situata të tilla duhet t’i kemi sa më të rralla, ose të mos i kemi fare. Grevistëve  u janë ndaluar lëngjet, serumet dhe ilaçet. Kemi pasur një komunikim me Policinë e Shtetit, i kemi shkruar zotit Hysni Burgaj që mediat, familjarët dhe lëngjet të lejohen të futen në çadër. Sot kam konstatuar se kjo gjë u është ndaluar. I kujtoj kujtdo që ka dhënë këtë urdhër, kujdes. Ky urdhër është në ekstremitetet e degradimit çnjerëzor. Eshtë një akt që dënohet nga konventat e BE-së. Ai që ka dhënë këtë urdhër ka përgjegjësi personale pasi kjo është një vepër penale". Re.Pu.