Usa Today ‘zbulon’ Kanunin, kushtetutën e vetme të shqiptarëve

Gazetarja e së përditshmes amerikane Usa Today, Nadia Shira Cohen e mbyll një shkrim mbi gjakmarrjen në Shqipëri me fjalët e një banori të malësisë së Shkodrës, që quhet Mark: “Unë besoj se ky vend do fillojë të jetë i lirë në atë moment, kur Kanuni i Lek Dukagjinit do të jetë kushtetuta e vetme, së cilës do t’i binden njerëzit”. Në po të njëjtin shkrim, citohet Gjin Marku, drejtori i Komitetit të Pajtimit të gjaqeve, të ketë thënë: “Problemi me gjakmarrjen në ditët e sotme është se secili ka interpretimin e vet për Kanunin; njerëzit, në vend të respektojnë Kanunin në formën fillestare e origjinale të tij, dhunojnë nenet e këtij kanuni, e kjo është arsyeja që gra të reja bëhen viktima; ky është problemi ynë i madh”.

Në artikull, si në të gjithë artikujt mbi këtë argument, bëhet një histori e gjakmarrjes dhe e Kanunit, flitet për raste konkrete (shkrimi fillon e mbyllet me një vajzë, që quhet Aurora, që është detyruar ta çojë jetën brenda katër mureve, duke parë TV e duke lundruar në internet), e jepet një kontekst socio-politik i këtij vendi që përshkruhet si mesjetar, në të cilin – kështu thuhet nga gazetarja amerikane – “gjykatat nuk janë efektive e qeveria shihet në masë  si e korruptuar”.

Re.Pu.