Turqia dënon “komplotistët”, burg përjetë për kryegjeneralin Bazbug

“Komploti Ergenekon”, një grup prej qindra personash publikë, ushtarakë dhe ish zyrtarë në Turqi, të akuzuar për tentative për grusht shteti kundër qeverisë Erdogan, dëgjoi sot dënimet e gjykatës në kompleksin ushtarak të Silivrisë pranë Stambollit. Nga 270 persona të cilët akuzohen për komplot për përmbysjen e qeverisë, 21 u liruan nga akuzat, por nuk mungojnë disa dënime me burg të përjetshëm, ku spikat ish shefi i shtabit 2008-2010, gjeneral Ilker Bazbug (ne foto me kryeministrin), për të cilin është thënë se ka origjinë shqiptare. Të tjera dënime të përjetshme morën gazetari Tunxhai Ozkan, gazetari e deputeti Mustafa Balbay, avokati Qemal Kerinsëz, kreu i Partisë së Punëtorëve, Dogu Perinxhëk etj. Qindra të grumbulluar pranë kompleksit, u bllokuan nga forcat speciale turke. Sipas BBC, një deklaratë interesante bëri pas shpalljes së dënimeve, deputeti republikan Akif Hamzaxhebi: “Të dënosh dikë që ka qenë kryekomandant i Forcave të Armatosura turke si anëtar i një organizate terroriste, domethënë të akuzosh dhe nxjerrësh para gjyqit gjithë ushtrinë”.

A.K