Shtypi hesht për projektin betonizues të Tiranës nga kryeministri Rama. Hesht dhe forumi i Trashëgimisë Kulturore

“Lapsi.al” ngre disa shqetësime në një shkrim të botuar sot. Në shkrim thuhet se asnjë nga të përditshmet e mëdha të vendit nuk ka ngritur pikëpyetje për projektin tinzar të paraqitur dje nga kryeministri Rama në thelb të të cilit qëndron shkatërrimi i sheshit përpara universitetit dhe popullimi i tij me kulla betoni. “Prej kohësh qarkullon akuza për një shtyp të blerë nga mafia e ndërtimit. Dhe nëse duhen prova për këtë ato mund të shihen në gazetat e sotme. Askush nuk ngriti pikpyetjen si lindi ky projekt që u publikua menjëherë pas fushate? Pse u mbajt i fshehtë deri në ditën e zgjedhjeve? Pse ndërkohë që socialistët përbetoheshin për moslejimin e ndërtimeve tek diga, përgatisnin masakrën në një zonë tjetër të mbrojtur? Pse nuk flet Erion Veliaj?”, janë disa nga pikëpyetjet që ngre “Lapsi.al”. Dhe më tej akoma: pse ka rënë squk forumi i Trashigimisë Kulturore. Pse nuk flasin ata që përgjëroheshin për traditën, apo ata sillen si intelektualë kur në pushtet është Berisha dhe si mercenarë kur atij ja zë vendin Rama? Sipas “Lapsi.al”, e vetmja gazetë që e ka denoncuar këtë skandal është fatkeqësisht RD-ja që se lexon askush, ndërkohë që nëse vërtet do të kishte shtyp në Shqipëri, ai duhet të bënte thirrje sot për protesta të ngjashme me ato të parkut "Gezi" në Stamboll.