Rritet jehona e debatit Dell-Surroi; deri dhe Zëri i Amerikës ‘përfshihet’ në të

Ballafaqimi në publik me shkrime e letra mes publicistit shqiptar Veton Surroi e ambasadorit amerikan Christopher Dell është shndërruar në një gjeratore që ka thëthitur dhe të tjerë. Deri dhe Zëri i Amerikës, gjë krejt e pazakontë për të, raportonte lidhur me këtë polemikë. Dhe duhet thënë se, në kundërshtim me atë që mund të pritej, raportimi nuk ka qenë në favor të Dell-it. Përkundrazi, raportimi ka qenë i një korrektese shembullore.

Po dje, ka qenë publicisti tjetër i Prishtinës, Shkëlzen Maliqi, që i është dorëzuar tundimit për ta thënë të vetën mbi këtë karfosje. Në këtë histori Maliqi mban anën e Dell-it dhe kritikon Surroin, i cili ka patur “një skenar ashiqare të dobët për t’u bërë president”, dhe nënvizon se e gjithë kjo kuturisje e tij presidenciale, që u finalizua me këtë letër lamtumirëse për Dell-in, ishte “një huqje trashanike”. Maliqi nuk është dakord me përpjekjet për ta diabolizuar ambasadorin amerikan, rrjedhimisht politikën amerikane në Kosovë, ashtu si nuk është dakord me “kritikën radikale që i bëhet perfomancës së pushtetit, dhe totalit të realitetit të Kosovës”.

E.G.