Romney në Londër: Bën gafë dhe 'hahet' me Cameron-in

Kandidati republikan për postin e Presidentit të SHBA-ve, Mitt Romney është për një vizitë në Londër. Dhe qysh në fillim ai bëri një vëzhgim të papritur kritik mbi lojrat olimpike, që fillojnë sot zyrtarisht. E bëri këtë vëzhgim edhe nga pozitat e atij që e di se si mund të përgatiten lojrat olimpike (Romney ka qenë organizatori i lojrave dimërore olimpike të vitit 2002, në Salt Lake City). “Londra nuk duket se është gati”, tha ai në thelb, me të vënë këmbët aty. Por reagimet ‘lokale’ ishin të menjëhershme. Iu përgjigjën disa vetë, por ranë në sy kryebashkiaku Boris Johnson dhe kryeministri David Cameron. Ky i fundit u shpreh me pak nervozizëm: “Të organizosh Olimpiadën në Londër nuk është njësoj si të organizosh lojrat olimpike në mes të hiçit (i referohet punës që ka bërë vetë Romney). Londra është qyteti më vital, më i gjallë e më i zhurmshëm në botë.”

Pas kësaj ndërhyrjeje e pas takimeve që ka patur në Londër, Romney i futi një indietro të fortë. “Londra duket se është gati për lojrat olimpike. Çdo gjë është ok”, tha ai sot. Dhe një numër mediash amerikane që anojnë nga demokratët e kapën menjëherë lajmin: “Romney është nga ata që e ndërron opinionin në harkun e 24 orëve; a mund të jetë President një njeri i tillë?”

E.G.