Rama mbledh koalicionin për të ndarë pushtetin në bazë të votave. Mungesa e Gjinushit, rastësi apo sinjal?

Pasi ka shpjeguar strukturën e re, Rama ka mbledhur krerët e partive aleate për të diskutuar ndarjen e përgjegjësive në qeverisjen e re të vendit. Mbledhja e njoftuar për në 17:00, ka nisur 2 orë me vonesë e po zhvillohet me dyer të mbyllura në selinë e PS-së.

Sipas vëzhgimit të Balkanweb, është vënë re mungesa e kryetarit të PSD-së Skënder Gjinushi.

Përkthimi i numrit të votave në pjesëmarrjen qeverisëse paraqet disa probleme, kryesisht për shkak të pritshmërive të disa liderëve (Ngjela i ka bërë të qarta pritshmëritë për Ministër Drejtësie), por dhe për faktin që “përgjegjësitë” duhet të kenë parasysh dhe moscënimin e punonjësve sipas statusit të punonjësit civil.

Sipas marrëveshjes me koalicionin e gjerë me 37 parti, marrja e “përgjegjësive” do të bëhet në nivel qarku për ato që kanë nga 500 deri 1000 vota dhe në nivel kombëtar për partitë me 5000 deri 10.000 vota, dhe partitë me mbi 10.000 vota, do të marrin pjesë në një bashkëqeverisje të shtrirë në nivel lokal dhe qendror.

200 mijë votat e LSI, pritet të përkthehen në 4-5 ministri.  

K.C.