Pikat kufitare me Malin e Zi, siguri maksimale për bllokimin e të dyshuarve terroristë, thotë drejtori i kufirit. Pse Frroku doli pa u shënuar në TIMS?

Rreziku nga kërcënimet e “ISIS” për vendet e Ballkanit ka bërë që Shqipëria dhe Mali i Zi të përforcojnë masat në pikat kufitare. Zv/drejtori i përgjithshëm i policisë së kufirit dhe migracionit Genc Merepeza i cilëson kufijtë të sigurtë për momentin, por shton se vigjilenca është maksimale. “2 vendet tona kanë instaluar në pikën kufitare të Muriqanit edhe sistemin e verifikimit për klandestinët, apo për shtetasit që kalojnë drejt vendeve të listës së zezë siç është Siria. Bashkë më sistemin janë dhuruar edhe pajisje logjistike dhe automjete për patrullimin e kufirit të gjelbërt”, tha Merepeza.

Duket se kjo siguri është vetëm për hyrjen. Tashmë i kërkuari i drejtësisë Arben Frroku, nga verifikimet e bëra menjëherë pas dënimit të tij, rezulton se është larguar nga Shqipëria pa u regjistruar fare në kufi nga sistemi TIMS. Sipas TIMS, Arben Frroku ndodhet në Shqipëri, ndërkohë që ai më 19 qershor u ndalua për 5 orë në kufirin malazezo- kroat dhe më pas u la i lirë, pas verifikimit se nuk ishte i dënuar apo person në kërkim. E njëjta polici skanon me skrupulozitet dhe kthen masivisht qytetarë që s’kanë pamjen e duhur për “turistë” apo jo aq sa duhet para me vete, por nuk shënon fare kalimin e një qytetari tjetër. Ajo që dihet me siguri është se të paktën, probleme parash Frroku nuk ka patur.

a.j