Paskal Milo: Rama s’më hap telefonin; ndërsa qurravecët e PS-së duan të më tregojnë se ç’është e majta

Në programin e Denis Mingës në News 24, Paskal Milo ka shprehur disa pakënaqësi ndaj Ramës e PS-së. Aleanca me LSI-në e ka nxjerrë atë, por dhe aleatët e vjetër të PS-së, në një pozicion jo shumë të rehatshëm. Në ndryshim nga aleatët në të djathtë, Milo e Co. në të majtë nuk e kanë të sigurtë vendin në parlament. Thënë me fjalë të tjera, do u duhet ta fitojnë me djersë.

“Jemi të vetëdijshëm që PS-ja na shiti për LSI-në, këtë e dinë gjithë shqiptarët, por ne të ardhmen tonë, kontributin tonë ndaj opozitës shqiptare nuk e lidhim me emra të përveçëm, por me kauzën dhe alternativën tonë”, u shpreh Milo në këtë program TV.

Duhet të ketë pasur probleme me dikë nga brenda PS-së. Këto probleme nuk i bën publike, por zemërimin e shpreh qartë: “Nuk ka asnjë njeri nga PS-ja që të më thotë se kush është e majta; nuk ka asnjë qurravec që të ma thotë këtë. Dhe PS-ja ka shumë qurravecë”. Por e ka dhe me Ramën, të cilin nuk ka mundur ta kapë në telefon këto kohë: “Telefoni i Ramës nuk funksionon më, vetëm kur ka ndonjë kritikë ndaj PDS-së”.

Ai e nxjerr një ‘sekret’, megjithatë, nga negociatat për listat e kandidatëve: “Oferta ka qenë nga zoti Rama [që unë të shkrij partinë e të futem në listat e PS-së], por unë ia kam thënë se për një karrige nuk mund ta shes partinë; unë nuk mund ta pranoja se ishte një detyrim që kam ndaj mijëra njerëzve që kanë luftuar me mua dhe përkrah PS-së”.

Re.Pu.