Na keni nxjerrë gabimisht nga shtëpia, na keni hequr edhe të drejtën të ankohemi në Gjykatë - i shkruan Berishës, familja Nushi

Ylli Nushi, jurist dhe ish-gjyqtar, djali i Gogo Nushit ish-ministër i Tregtisë i Shqipërisë në vitet '60 ka botuar një letër të hapur për Berishën sot në të përditshmen DITA. Nushi dhe familja e tij janë nxjerrë nga shtëpia këto ditë në zbatim të Aktit Normativ të Qeverisë “Për lirimin e shtëpive të ish­pronarëve”.

I shkruan Nushi, Berishes: "Me profesion unë jam jurist, madje për disa vite kam qenë edhe gjyqtar dhe e di mirë se ç’do të thotë të japësh një vendim te padrejtë. Është njësoj sikur një mjek t’i japë pacientit të tij një ilaç që në vend ta shërojë e helmon, e vdes atë. Te tre fëmijët e mi që nuk e kanë jetuar kohën time, por që jetojnë me parimet e demokracisë së vërtetë, janë aktualisht para një dileme për jetën. Ju lutem që me kompetencën që iu jep ligji, të ndërhyni pranë Entit të Banesave për anulimin e Aktit të nxjerr ndaj meje në kundërshtim flagrant me ligjin... Unë kam qenë dhe jam i bindur plotësisht se e drejta ka qenë dhe vazhdon të jetë me mua dhe zgjidhja e kësaj çështjeje s’ka nevojë as për përmbarim dhe as për policë, por për një shqyrtim objektiv nga gjyqtarë me ndërgjegjje të lartë juridike. Qofsha i gabuar, por kam mendimin se gjithë ky nxitim i panevojshëm dhe ky veprim kaq absurd dhe antiligjor, është i paramenduar për të mos më lënë hapësirë për të marrë sadopak frymë vetëm sepse unë jam i biri i Gogo Nushit. Për mua ky vendim është haptas i kundraligjshëm, një vendim politik të cilin me përbuzje refuzoj ta zbatoj. Refuzoj ta zbatoj jo për kapriço, por sepse unë jam në shtëpinë time..."

Nushi shpjegon me detaje që nuk jeton në shtëpi të shpronësuar, por me kontratë qeraje të rregullt etj. pra nuk është subjekt i Aktit Normativ Nr.3 të Qeverisë të kthyer tashmë në ligj. Por më e rëndësishmja është që nga letra e tij kuptohet dicka e rëndë që nuk është prekur thuajse fare në media: Akti Normativ i qeverisë për këtë kategori, vec nxjerrjes nga shtëpitë, ua ka hequr këtyre njerëzve të drejtën për t'u ankuar në Gjykatë (!!). Një vendim qeverie që ndal Gjykatën të gjykojë një ankesë?! Eshtë e habitshme dhe e pashpejgueshme se si mund të ndodhë kjo shkelje flagrante e të drejtës bazike për t'u ankuar dhe asnjë jurist apo avokat nuk flet për këtë.  

Shkruan Nushi: "Me vendim të formës së prerë ­ për shkak se mua ligji nuk më jep të drejtë ankimore – Gjykata e Shkallës së Parë Tiranë më 11.01.2013 ka hedhur poshtë kërkesën time drejtuar atij organi me anën e së cilës unë kërkoja pezullimin e vendimitme anën e të cilit urdhërohej Zyra Përmbarimore për të më nxjerrë mua familjarisht – forcërisht nga banesa ku jetoj prej vitesh..." (a.th)

Letra e plotë:

http://gazetadita.al/debimi-nga-shtepite-djali-i-gogo-nushit...

Në foto: Nje vajze duke u perlotur, gjate aksionit policor per zbatimin e aktit normativ te qeverise per lirimin e banesave per ish-pronaret, ne godinen e cerdhes numer 46 prane 21 Dhjetorit. LSA