Në fillim Vehbiu, pastaj Marku, e sot swrish Vehbiu bëjnë një “polemikë” jo filologjike

Në një shkrim të publikuar në blogun e tij Peizazhe të Fjalës, Ardian Vehbiu ka vënë re një pasaktësi shkencore të dr. Myftar Barbullushit, dhe merret me të në mënyrën e vet. Shkrimin e fillon: “Në një artikull botuar më dt. 24 maj në “Panorama” (Telefonata e tmerrshme), Dr. Myftar Barbullushi flet për kancerin e prostatës dhe analizën që përdoret rëndom për ta dalluar atë herët – të njohur si testi PSA (Antigjeni specifik i prostatës)…. Përfundon dr. Barbullushi: “Më 23 qershor do t‘u rekomandoja meshkujve mbi 50 vjeç të bënin një analizë të PSA-së në vend të një vote partive politike”, duke vënë në një rrafsh, dashur pa dashur, pjesëmarrjen në zgjedhje, që është detyrë e çdo qytetari të Republikës, me analizën e PSA-së” (shkrimin mund ta lexoni të plotë në linkun http://xhaxhai.wordpress.com/2013/05/26/votoni-me-prostate/).

I është përgjigjur Mark Marku, të cilit i ka bërë përshtypje që “Vehbiu, me njohuri dhe kontribut jo të pakët në fushën e studimeve filologjike, të konkretizuar edhe në libra me nivel si ‘Shqipja totalitare’, shndërrohet papritur në mjek dhe konsulent i kancerit të prostates” (shkrimin e Markut mund ta ndiqni në linkun http://www.panorama.com.al/2013/05/30/doktor-vehbiu-dhe-analiza-filologjike-e-testit-te-prostates/).

Dhe sot, po në Panorama, Vehbiu i përgjigjet Markut. Përgjigja nuk ka asnjë ton polemik. Thjesht bëhet saktësimi se çështja për të cilën ai ka folur nuk është e një niveli shkencor, por është një çështje, për të cilën Vehbiu vetë është informuar nga mjetet e informit publik, siç është dhe gazeta New York Times. Vehbiu bën dhe saktësimin tjetër se shkrimin e vet ai e ka publikuar në një blog, në blogun e vet, në blogun personal, që “i ngjan një ditari [ku ai] ia lejon vetes të shprehet për gjëra nga më të ndryshmet”. Shkrimin e Vehbiut mund ta lexoni në Panoramën e sotme, ose pasdite në versionin online të së njëjtës gazetë.

Re.Pu.