Kreshnik Spahiu ëndërron suksesin që Alexis Tsipras pati në zgjedhjet greke

Kreu i Aleancës Kuqezi, Kreshnik Spahiu, në një takim me banorët e zonës së Gorës në Korcë, ka deklaruar se nuk do të bëjë aleancë me PS-në në zgjedhjet e vitit 2013-të. Spahiu është shprehur se AK-ja do të lërë në opozitë Ramën dhe do të nxjerrë Berishën në pension.

Duke hequr një paralele me zgjedhjet e fundit greke, në të cilat koalicioni i partive të vogla SYRIZA sfidoi dy partitë e vjetra greke, Spahiu tha: “Rama dhe Berisha, në panik, kanë formalizuar modelin politik grek si të PASOK-ut dhe Demokracisë së Re, duke i hapur dyert njeri-tjetrit për një koalicion në zgjedhjet e ardhshme. Aleanca KuqeZi do të jetë lokomotiva nacionaliste e koalicionit të lëvizjeve patriotike në zgjedhjet e ardhshme”.

Gjuha e Spahiut është e ngjashme me atë të kreut të SYRIZA-s, Alexis Tsipras, i cili nuk pranoi të bënte koalicion me PASOK-un apo me Demokracinë e Re. Por SYRIZA mori vetëm 26.9% të votave në zgjedhjet e fundit, duke mos arritur të dilte e para dhe të krijonte një qeveri të udhëhequr prej saj.

Ndërsa “koalicionit të lëvizjeve patriotike” që pretendon të udhëheqë Spahiu do t’i duhet të marrë mbi 50% të votave në rang kombëtar dhe do t’i duhet t’i ketë ato të shpërndara në të gjitha qarqet, në mënyrë që ta nxjerrë Sali Berishën në pension dhe ta lërë Edi Ramën në opozitë për katër vite të tjera.

Në të vetmin sondazh publik të zhvilluar me kampion përfaqësues kombëtar, të sponsorizuar nga Fondacioni Shoqëria e Hapur për Shqipërinë (http://www.soros.al/2010/foto/uploads/File/Adela/Permbledhje%20ekzekutive%20.pdf),

rezultonte se, në qershor, 37% e votuesve ishin përkrahës të PS-së, 33% të PD-së, 5% të AK-së, 4% të FRD-së, 2% të LSI-së, etj.

5-përqindëshi i AK-së është shumë larg 50-përqindëshit që do t'i duhet për ta lënë Edi Ramën në opozitë dhe për ta nxjerrë Sali Berishën në pension…

E.Zaloshnja