Kosova më e interesuar se Shqipëria për zhvillimet në Maqedoni

“Asnjë mjek shqiptar në spitalin e Shkupit” – ky është një nga ato lajme që gjenden në shtypin kosovar, e që zakonisht nuk t’i sheh syri në shtypin e Tiranës. Është një dukuri që ndodh shpesh. Shtypi i Tiranës ka një optikë të reduktuar të interesit kombëtar; të paktën, më të reduktuar se sa shtypi i Prishtinës. Në këtë të fundit ka vazhdimisht informacion mbi botën shqiptare në tërësi. Ka më shumë lajme mbi Shqipërinë në shtypin e Kosovës se sa lajme nga Kosova në shtypin e Tiranës. Ky fakt mund të shpjegohej shpejt e shpejt me një kompleks të supozuar inferioriteti të Prishtinës ndaj Tiranës, por e vërteta është se shtypi i Prishtinës ka një informacion të plotë mbi, fjala vjen, zhvillimet në Maqedoni, sidomos në pjesën shqiptare të Maqedonisë. Nuk është se në Tiranë mungon infomacioni mbi shqiptarët e Maqedonisë, por është më i rrallë dhe jepet në mënyrë përtace, si të ish fjala për një punë angarí. E njëjta gjë mund të thuhet dhe për ngjarjet në Mal të Zi, e në përgjithësi në diasporë.

E.G.