Jo. Berisha nuk erdhi në pushtet me zgjedhje të vjedhura, - thotë Mero Baze

“Jo. Berisha nuk erdhi në pushtet me zgjedhje të vjedhura. Ato ishin zgjedhje të mira dhe reale. Berisha erdhi në pushtet së pari fal Fatos Nanos dhe taktikës së tij shumë të gabuara elektorale. Opozita votonte në ato zgjedhje një kandidat edhe pse ishin në koalicion disa parti, ndërsa socialistët dhe aleatët e tyre votonin secili për hesap të vet. Ai ishte një gabim fatal dhe foshnjarak”.

Pjesa më sipër është shkëputur nga një intervistë e Mero Bazes për fushatën e zgjedhjeve të 2005 (Baze ka qenë ndër strategët e asaj fushate bashkë me amerikanët e BG&R) në të përditshmen DITA, e cila ka dalë në treg këto ditë.

Baze konfirmon informacionet e botuara në revistën amerikane The New Republic disa ditë më parë dhe jep detaje të lidhura me Fazllic dhe konsulentët amerikanë të Berishës, sot në stafin e Romney në SHBA. (Baze aludon edhe një skandal rozë në hotelet e Tiranës të lidhur me personat që përmend).

Thotë Baze në DITA për fitoren e PD në 2005: “Unë nuk i besoj teoritë konspirative se Nano ka dashur të lërë vetë pushtetin, por nuk kam njohur ndërkohë ndonjë lider të bëj ndonjë gabim kaq të trashë. Janë rreth 20 deputetë që ka fituar PD-ja nga kjo skemë dhe prapë mezi ia doli të ishte kokë më kokë. Nga Tirana në Sarandë çdo deputet i PD-së që ka fituar ka fituar nga kjo skemë e Fatos Nanos. Nuk ishte meritë as e Berishës, as e strategëve të tij, por meritë e idiotësisë së Fatos Nanos. Kësaj merite të Fatos Nanos iu bashkua dhe imazhi i ndryshuar i Berishës, i cili e bëri më pak të frikshme ndryshimin. Dhe natyrisht më të mëdha pasojat më pas” Re.Pu.

Intervista e plotë në kopjen print të së përditshmes DITA