A ia kanë ndërprerë vërtet fjalën në KiE, kryeministrit të Shqipërisë?

E përditshmja "Shqiptarja.Com" në kronikën e saj mbi fjalimin e Berishës dje në Këshillin e Europës në Strasburg shkruan se kryeministrit të Shqipërisë i është kërkuar të nxitojë dhe t'i japë fund fjalimit, pasi ai kishte kaluar minutën e trembëdhjetë. (disa nga dëgjuesit ishin larguar që pas 5 minutave të para, ndërsa kreu i KiE shihte vazhdimisht orën i nervozuar– raporton Shqiptarja.Com).

Eshtë e paqartë nëse ka ndodhur për shkak të kohëzgjatjes apo temës së fjalimit, por në një pjesë të tij, kryeministri Berisha ka folur për "një lidhje të ndërsjellë mes tregjeve dhe demokracisë" dhe ka shprehur teza të tipit: " demokracia i ka vendosur disa kufizime tregut". Ka thënë Berisha ndër të tjera:

"…Unë jam mjek në profesion dhe si rezultat do të doja të ilustroja këtë situatë me lidhjen mes koshiencës dhe subkoshiencës, një lidhje shumë e rëndësishme për qeniet njerëzore. Vetë demokracia është shumë e rëndësishme, është jetike do thosha, por nëse do shohim veprimet e saj, sigurisht që ajo mund të sjellë ca prishje të tregut. Le t’i hedhim një sy Europës sot. Jemi këtu në një nga rajonet më të begata, por 11% e njerëzve të botës po konsumojnë 50% të faturës sociale të botës, ndërsa po prodhojnë 70% të PBB. A është i mbingarkuar tregu në këtë rast? Duket se po. Tani problemi që shtrohet është që qeveritë e elitave duhet ta marrin shumë seriozisht krizën, do të duhet të ndërmarrin reforma shumë serioze, sepse opinioni publik nuk është shumë mbështetës, për shkak të faktit se nuk është i bndur që kriza nuk ka mbaruar. Ndërkohë problemi kryesor, ose i treti më i rëndësishëm është tregu i punës. Sërish demokracia i ka vendosur disa kufizime tregut dhe ai është më tepër strikt se sa fleksibël…" etj  - Re.Pu.