I 'poqi' gazetat vapa e korrikut apo ka diçka tjetër në këtë mes?

Me përjashtim të së përditshmes Shqiptarja.Com e cila i kishte dhënë ngjarjes titullin e madh të faqes së parë, të përditshmet e tjera të Tiranës, e kishin shmangur sot nga faqet e para lajmin e vetëvrasjes së Alma Gjergjit, motra e ministrit Arben Imami, dhe bashkëshortja e drejtuesit të Departamentit të Gazetarisë në Universitetin e Tiranës Bashkim Gjergji.
Në fakt mirë kanë bërë, por shmangia e lajmit nga faqet e para (Shqipi e kishte diku në cep, Panorama, Shekulli etj nuk e kishin) është një sjellje e papritur e shtypit të Tiranës nëse kihet parasysh zelli (ndonjëherë krejt pervers në detaje) me të cilin janë trajtuar më parë nga gazetat tona këto tip kronikash, sidomos nëse bëhet fjalë për një person publik apo të lidhur me emra publikë. Nuk është nevoja të bëjmë ndonjë listë të dhimbshme vrasjesh e vetëvrasjesh për ta vërtetuar këtë sepse shembujt janë fare të freskët. “Këta nuk të lënë as të vdesësh” – shkruante i ndjeri Ardian Klosi (edhe vetë viktimë e kësaj sjellje) pas vetëvrasjes së aktorit Llazi Sërbo.
Të jenë “pjekur” vallë papritur në këtë vapë korriku të përditshmet e Tiranës apo të ketë diçka tjetër në këtë mes?
(A.N.)

Në foto: Makina e ministrit Imami në vendin e ngjarjes. E ndjera Gjergji, 53-vjeçare, nënë e një vajze e cila jeton në Francë, ekonomiste me profesion, sipas raportimeve të para i ka dhënë fund jetës në shtëpinë e saj në rrugën Perlat Rexhepi, shumë pranë Fakultetit të Drejtësisë.