Gratë topless në Europë janë një praktikë banale, ndërsa në SHBA nuk lejohen

Sondazhet e bëra thonë se 80% e grave në SHBA do donin të dilnin topless në plazh. Është një shifër që flet qartë për një main-stream, mirëpo ende kjo gjë nuk është e lejuar në pikëpamje legale. Ka një lëvizje ‘Go Topless’, që po kërkon ta shtrijë barazinë gjinore edhe në këtë drejtim, por ende ka rezistencë nga establishmenti politik dhe kulturor. Përderisa burrat dalin gjokszbuluar, pse të mos dalin dhe gratë? – kjo është pyetja që shtrohet në terma kulturorë. Por ka dhe një shqetësim të natyrës praktike, që lidhet me faktin që grave u ndalohet të marrin ngjyrë integrale gjatë pushimeve buzë detit, gjë që, sipas ca e cave, e shëmton trupin e femrës.

Para tetëdhjetë a nëntëdhjetë vitesh, edhe burrat gjokszbuluar në plazhet e Amerikës ishin një praktikë e ndaluar; të gjithë burrat ishin me këmishë në plazh, dhe janë të shumtë ata që evokojnë një situatë të tillë për të nxjerrë në evidencë faktin që qëndrimi i sotëm ndaj grave topless në plazh është gjithashtu një paragjykim.

Është vërtetë paragjykim? Për shumicën e vendeve europiane, po. Në Spanjë, fjala vjen, që është një vend katolik, nuk ka asnjë plazh, ku të ndalohen gratë topless. Dhe në shumë vende të tjera të Europës, të zë syri në parqe e në plazhe gra gjokszbuluara (sapo ngrohet moti), të cilat ndihen krejt të pabezdisura. Amerikanët kanë ç’i mësojnë Europës, por herë pas here i kthejnë sytë nga kontinenti i vjetër. Në mos për të imituar modele e sjellje sociale, të paktën për t’i shqyrtuar, e për t’u ballafaquar me, ato.

E.G.