Gazeta Proto Thema “frikë” nga nacionalizmi i Aleancës KuqeZi. Dule: Spahiu, sharlatan

Ekstremisti i djathtë shqiptar që trondit Athinën”, është titulli i shkrimit të sotëm në gazetën Proto Thema, kushtuar kryetarit të Aleancës Kuqezi, Kreshnik Spahiu, njofton Balkanweb.com. 

“Kufij deri në Kostur dhe në Prevezë ëndërron kreu Aleancës Kuqezi, Kreshnik, Spahiu”. Me këto fjalë hapet shkrimi i gazetarit Panajoti Savidi, shkrim që është nxitur nga njoftimet e deridjeshme për një miting të AK, në qendër të Athinës."Mihaloliakos-shqiptar përdor si flamur të vetin antihelenizmin dhe kërkon të shtrijë kufijtë e Shqipërisë deri në Prevezë e Kostur. Orator i mirë, 43 vjeçari tashmë me stil sportiv, arrin të ngrejë peshë publikun e ekzaltuar, i cili sheh në profilin e tij, udhëheqësin që do të mbyllë në burg politikanët e korruptuar të vendit dhe do bëjë realitet Shqipërinë e madhe. Antihelenizmi është flamuri i AK, sepse sipas Kreshnik Spahiut, pas çdo të keqeje që ndodh në Shqipëri fshihet Athina, që ka qëllim copëtimin e vendit dhe marrjen e Vorioepirit”, thuhet në shkrim. Krahasimi i Spahiut me kreun e Agimit të Artë, ngjan i sforcuar, përderisa Aleanca ka qendrim mbështetës e përkrahës ndaj romëve e pakicave të tjera të margjinalizuara të shoqërisë, ndryshe nga ksenofobia e Agimit të Artë. Po ashtu, Agimi i Artë nuk e sheh të keqen te politikanët e korruptuar, por te emigrantët.Në fund, qershiza mbi tortë, merret vesh se nga ku buron ‘informacioni’ për Spahiun, pasi autori i shkrimit i referohet një deklarate të kreut të PBDNj, Vangjel Dule, sipas të cilit Kreshnik Spahiu është "një sharlatan i politikës shqiptare, një populist që gjithmonë hedh baltë mbi kundërshtarët e tij dhe ka bërë flamur të vetin antihelenizmin. Ky njeri nuk ka qëndrim për problemet e brendshme të shqiptarëve dhe ajo që di është të bëjë, është demagogjia”. K.C.