Egjipti, në prag të vendimit për njohjen e Kosovës

Egjipti është në prag të marrjes së vendimit për njohjen e shtetit të Kosovës, ka konfirmuar gjatë qëndrimit të tij në Prishtinë, kryetari i Këshillit Egjiptian për Çështje të Jashtme, Mohamed Ibrahim Mahmoud Shaker. “Besoj që shumë shpejt madje në çdo moment pritet njohja e Kosovës nga Egjipti”, ka deklaruar Shaker - raporton radio amerikane Europa e Lirë.
Ambasadori egjiptian ka thënë po ashtu se pas njohjes së Egjiptit pritet të ketë lëvizje në këtë drejtim. “Jemi të bindur që njohjet nga shtetet islame do të vijnë ngaqë shumica prej tyre e konsiderojnë Kosovën si një vend me shumicë islame. Por, kjo, mbase është çështje kohe. Besojmë se pas njohjes nga Egjipti do të vijojnë edhe njohje të tjera nga vendet afrikane, arabe e islame”, është shprehur Mohamed Shaker.
Njohja nga Egjipti, në Prishtinë konsiderohet si një kthesë në procesin e krijimit të subjektivitetit ndërkombëtar të shtetit të Kosovës. Egjipti konsiderohet një nga shtetit me më shumë ndikim në botën arabe dhe islame. a.n.