Duket PS-ja e ka marrë seriozisht metaforën e Mustafa Nanos për qelbësirat kundër Saliut - i shkruajnë Berishës vëllezërit Shyti

“Listës së kandidatëve të PS për deputetë do t’i shtohet Dhori Sollaku me urdhër të prerë të organizatës kriminale “Hakmarrja për Drejtësi”, që sundon mbi z. Rama” – lexoi para dy ditësh zëdhënësja e Berishës (në foto). Fjalia ka kaluar pa shumë vëmendje nga mediat, por është e disata herë që Berisha ripërmend termin “Hakmarrje për Drejtësi” që lidhet më së shumti me gjykimin e vëllezërve Shyti. Dhe këta të fundit i janë përgjigjur sërish me një letër në agjensinë e lajmeve AMA, ku ndër të tjera lexohet:

"...Deri më 12 shkurt të vitit 2003, ne e kemi parë Sollakun si nëpunës të shtetit. I jemi drejtuar në tre-katër raste me kërkesa të shkruara që ta zgjidhte problemin tonë sipas ligjit. Në datën e përmendur gjykata deklaroi se nuk kishim krijuar organizatë kriminale dhe nuk kishim kryer asnjë nga dhjetëra krimet që na kishte atribuuar Saliu më 16 tetor 1996. Fill pas shpalljes së vendimit, Sali Berisha deklaroi se ne ishim fajtorë, por gjyqtarët na e dhanë pafajësinë se ishin edhe ata anëtarë të “Hakmarrjes”. Pa u shuar jehona e klithmës së Saliut doli para mediave Theodhoriu, shërbëtori i tij i hershëm dhe tha se gjyqtarët e kishin dhënë vendimin nën presion, të frikësuar prej nesh. I dhanë përgjigje publike gjyqtarët, iu përgjigjëm edhe ne. Nën presionin e Saliut dhe shërbëtorit të tij Dhori Sollaku, në kundërshtim me ligjin, me pretekstin se do bëheshin hetime të reja vendimi i gjykatës u prish. Ndodhi që disa muaj më vonë u vra shoferi i familjes së Prokurorit të Përgjithshëm. Ngjarja qe fare rastësore dhe shkaqet banale. Kështu deklaroi në mënyrë të përsëritur edhe vetë Sollaku dy ditët e para që pasuan ngjarjen. Ngjarjen fatkeqe e shfrytëzoi Sali Berisha për të akuzuar krijesën e tij “Hakmarrjen” dhe për t’i dhënë vlera shërbëtorit të tij, Dhorit..."

Më pas letra thotë për PS-në: "...Ne nuk e dimë se çfarë vlerash pa PS-ja tek Dhori Sollaku që e përfshiu në strukturat e saj drejtuese. Kur e morëm vesh nuk na erdhi mirë, por e kaluam duke thënë: duket PS-ja e ka marrë seriozisht shprehjen metaforike të Mustafa Nanos për bashkimin e gjithë qelbësirave kundër Saliut. As tani nuk kemi ndërmend të shprehim mendim për mesazhin që u përcillet votuesve kur partitë përfshijnë në strukturat e tyre njerëz pa dinjitet, që kanë shkelur ligjet për t’i shërbyer Sali Berishës....” A.N.

Deklarata e PD:

http://www.panorama.com.al/2013/03/04/pd-rama-dhe-celibashki...

Përgjigja:

http://www.ama-news.al/2013/03/saliu-hakmarrja-dhe-theodhoriu/