Dritan Prifti është i sigurtë: Meta pas zgjedhjeve kalon me Berishën

Dritan Prifti që kandidon si i pavarur në qarkun e Fierit ka qenë mbrëmë më programin e Ilva Tares, dhe aty ka folur për aleancën Rama-Meta, e cila, sipas tij, është ngritur dhe mbi kushtin që Meta i ka vënë të parit të socialistëve. “Nuk dua që Dritan Prifti të jetë në listën e PS-së”, pretendon Prifti se Meta i ka kërkuar Ramës. Dhe Rama ka rënë dakord, thotë ai.

Dhe më poshtë lëshoi një të fortë. “Meta vazhdon të jetë aleat me Sali Berishën”, tha ai. Dhe vijoi: “Nuk është i rastësishëm debati se kush do të jetë kryeministër. Është parapërgatitje që mbas zgjedhjeve Meta t’i thotë Ramës që nuk e bën dot qeverinë pa mua dhe unë dua të bëhem kryeministër. Në momentin që Rama nuk do të pranojë, unë e garantoj që Meta do të shkojë brenda ditës te Berisha.”

Çfarë provash ka për këtë? “Sekseri që ka bashkuar zotin Rama me zotin Meta, disa ditë më parë ka qenë në takim me Sali Berishën. Gjithë Shqipëria e di emrin e sekserit të ngjalave”, thotë ai, pa ia përmendur emrin Leonard Kokës. Madje, foli dhe për foto që e demonstrojnë këtë takim”. Një takim Berisha-Nard Koka? Ky do ishte scoop-i i dhjetëvjeçarit të fundit. Por Prifti nuk publikoi gjë. Madje, në programin e Ilva Tares ka ndërhyrë me sms dhe Leonard Koka, duke e nxitur Priftin që t’i publikojë fotot, nëse i ka, por Prifti nuk e ka zgjatur më shumë këtë bisedë.

Re.Pu.