Debat në Zërin e Prishtinës lidhur me islamin radikal: Xharra versus Kurti

Arbana Xharra, kolumnistja e Zërit të Prishtinës, ka shkruar një artikull me titull “Manovrat e pabesueshme të Kurtit”, ku merret me qëndrimin e këtij të fundit (është fjala për Albinin) në rrethanat që disa imamë kanë bërë sulme ndaj grave, e konkretisht ndaj deputetes së VV-së, Alma Lamës, e cila, sipas autores, lëviz nëpër Prishtinë nën masa sigurie për shkak të kërcënimeve nga ekstremistë islamikë. Xharra citon një, a më shumë imamë, të kenë thënë se “femrat e Shqipërisë janë lavire”, dhe se “Alma Lama është refugjate”.

Kurti, sipas gazetares, ka lëvizur në binarë oportunistë në një situatë të tillë, dhe nuk ka guxuar as të marrë në mbrojtje deputeten e vet. Në një shkrim të tijin me titull “Feja dhe Kombi”, i pari i VV-së, nuk ndalet fare tek kërcënime të kësaj natyre, të cilat  janë denoncuar edhe nga “disa besimtarë të fesë myslimane, imamë të rrahur e të kërcënuar, … dhe të rrezikuar vetëm pse kishin dalur haptazi kundër wahabizmit”. Xharrës pra i ka bërë përshtypje fakti që Kurti “i ikën realitetit” nga pozitat e një “taktikuesi politik”.

“Edhe pse kërcënimet bëhen publike, pastaj edhe rastet konkrete që kanë ndodhur që nga mbarimi i luftës e deri me tash u riaktualizuan, Albini thotë se ‘mediat e regjimit paskan nxjerrur videoincizmet e vjetra të klerikëve për të ndezur polemika për të larguar vëmendjen nga problemet tjera’, duke amnistuar kështu grupet të cilat po kërcënojnë haptazi qytetarët e këtij vendi e në mesin e tyre edhe përfaqësuesen e ‘Vetvendosjës’”, shkruan Xharra.

Shkrimin e plotë të Xharrës mund ta ndiqni në linkun http://www.zeri.info/artikulli/8020/manovrat-e-pabesueshme-te-kurtit Ndërsa shkrimin e Kurtit, me të cilin Xharra polemizon, mund ta gjeni në linkun http://www.zeri.info/artikulli/7683/kombi-dhe-feja

Re.Pu.