Bugajski argumenton për mosdhënien e Albpetrolit Moskës apo Pekinit

Në një intervistë dhënë gjatë fundjavës për revistën Java, Janusz Bugajski, analist i Qendrës për Studime Strategjike Ndërkombëtare në Uashington, argumenton pse shteti shqiptar nuk duhet t’ia shesë Albpetrolin njërës prej dy kompanive të shtetit rus, ‘Gazprom’ dhe ‘Rosneft’. “Kjo lloj ujdie do fuqizonte strategjinë e Moskës, për të krijuar monopole rajonale të energjisë, duke krijuar dominancë politike në Ballkan, duke kufizuar pavarësinë e shteteve si Shqipëria dhe duke minuar influencën amerikane,” thotë Bugajski.

Ndërsa në një opinion të botuar sot në gazetën Mapo, Bugajski argumenton pse shteti shqiptar nuk duhet t’ia shesë Albpetrolin kompanisë shtetërore të energjisë së Kinës ‘Sinopec’. Shkruan Bugajski: “Investime kineze sjellin probleme për vendet mikpritëse. Për shembull, korporatat kineze këmbëngulin në importimin e një numri të madh të punonjësve të tyre për të jetësuar projektet, duke u mohuar kështu komuniteteve lokale vendet e punës dhe zhvillimin ekonomik. Pekini gjithashtu nënshkruan kontrata që përcaktojnë se pajisjet dhe lëndët e nevojshme për projektet të vijnë nga Kina, duke sjellë kështu stimuj të paktë për ekonominë vendase.” Dhe për ilustrim ai sjell shembullin e Polonisë, ku një investim kinez për ndërtimin e autostradës Varshavë-Lodz solli konflikte me qeverinë polake.

Re.Pu.