Bazhdari: “Shoqëria shkodrane, ende jo e gatshme të udhëhiqet nga opinioni publik i formësuar në gjirin e elitave që e përfaqësojnë". Strukturat e forcës sime politike nuk ishin në mood-in e tyre më të lartë”

“Shkodra do të bëhet”- kështu e titullon opinionin e vet Keti Bazhdari, kandidatja e mazhorancës në Shkodër e cila humbi përballë Voltana Ademit. Bazhdari ka një shpjegim për këtë që ndodhi, shpjegim të cilin në opinionin e vet e parapërgatit me tablonë gati migjeniane të qytetit verior. “Më kujtohen shumë momente mes takimesh me sytë gjithë shpresë që më vështronin, mes fjalësh gjithë moskuptim e vuajtje që duheshin kuptuar e çliruar, mes zhgënjimesh që nuk duheshin përsëritur, mes lotësh që duheshin përkthyer në buzëqeshje, mes premtimesh me shtrëngime duarsh që duheshin mbajtur, mes fëmijësh që kishim forcën që të ëndërronim së bashku pas çdo takimi me të rritur”, shkruan Bazhdari. E teksa disa nga kampi tjetër shkruajnë e këmbëngulin se vota e Shkodrës është vota e lirisë, vota europiane kundër kuqëlizimit total, Bazhdari, na rrëfen një tjetër pamje: “E dija që do rëndonin mbi kurrizin tonë dhe nga varfëria e këtij popull disa reforma të forta, aq shumë të nevojshme për t’i ardhur era shtet Shqipërisë, e megjithatë e ndërmora hapin e bindur në mirëkuptimin e gjithsecilit që ëndërron të jetë pjesë e Europës së shpejti. E dija që strukturat e forcës sime politike nuk ishin në mood-in e tyre më të lartë, por realisht besova se projekti ynë ishte një inspirim shumë herë më i madh që i tejkalonte pakënaqësitë personale, ndaj s’fola. E dija që enveristët e fundit të kamofluar, zhugatur me blu, do na vërsuleshin si të ishim armiqtë e klasës dhe jo alternativa tjetër me ide e potenciale për ta zhvilluar Shkodrën. E dija…, e dija…, por vendosa të mos flas sepse besoja fort që mekanizmat e kurtheve do i thyente intuita e më të mirëve që përbën opinionin publik të një vendi. Por ndoshta pikërisht kjo ishte e parakohshme, thonë kritikët. S’funksionoi aq sa duhej. Pikërisht ajo që unë, ne, shpresuam më shumë se gjithcka tjetër, duhej të funksiononte ndryshe. Shoqëria shkodrane rezultoi që s’është ende e gatshme të udhëhiqet nga opinioni publik i formësuar në gjirin e elitave që përfaqësojnë vetë atë, siç ndodh në çdo vend të botës. Ndoshta këtu gabuam”. Një letër e hapur pra për qytetarët, mesazhi i së cilës është: ju nuk e kuptuat alternativën më të mirë, sepse ajo është para jush në kohë. Dhe ndryshe nga krahu tjetër, kandidatja e mazhorancës thotë se Shkodra “e humbi” Europën me këtë që bëri, por kjo edhe për faj të Rilindjes. "Refuzuam të kemi të bëjmë me pjesën e errët të realitetit, atë që pati ende forcën ta mbajë gjallë, përballë ëndrrave, shpresës, pasionit, aftësisë, energjisë, mundësisë së ndryshimit e qindra strategjive e netëve pa gjumë, pushtetin e hijeve, të dalë në pension prej kohësh, të shterruar idesh e energjish dhe që zvarritet rrugëve të Shkodrës duke u mbajtur nëpër bastunër ideologjik", vijon ajo(http://www.gazetatema.net/web/2015/06/28/shkodra-do-te-behet/).
Si votoi pra Shkodra përtej raportit numerik? Me votë europiane, apo jo?
s.z