A. amerikan, Lu, mesazh Halim Kosovës: “Ambasada jonë ka folur shpesh rreth politikanëve të korruptuar dhe kriminelë...Ju ishit i angazhuar në një proces të ndershëm dhe të hapur”

Ambasadori amerikan në Tiranë Donald Lu i ka dërguar kandidatit të opozitës për Tiranën, Halim Kosova, një mesazh urimi për fushatën qytetare që zhvilloi. Lu ka cilësuar se Kosova ka dhënë një kontribut për shëndoshjen e sistemit politik në Shqipëri. Më poshtë mesazhi i ambasadorit amerikan që vë edhe njëherë theksin te kandidatët e kriminalizuar. “I dashur Dr. Kosova. Doja t’iu dërgoja këtë letër, për t’iu përgëzuar për fushatën pozitive për Bashkinë e Tiranës dhe të përqendruar në problematika. Ambasada jonë ka folur shpesh në muajt e fundit rreth politikanëve të korruptuar dhe kriminelë, që janë përfshirë në blerje vote, shantazhim dhe manipulim të institucioneve demokratike. Në kontrast me këtë, ne pamë që ju ishit personalisht i angazhuar në një proces të ndershëm dhe të hapur. Ju folët për çështje, që shqetësojnë votuesit e Tiranës. Ne mendojmë se fushata juaj ishte një shenjë për qytetarët shqiptarë, se sistemi i tyre politik po maturohet. Ne ju falenderojmë për përpjekjet tuaja për të përmirësuar vendin. Në veçanti, ne vlerësojmë punën tuaj të jashtëzakonshme si ministër i Shëndetësisë. Mezi pres të bisedoj me ju për këto çështje, në një të ardhme të afërt. I pari që e vuri re këtë lloj fushate të dr. Kosovës ishte kryetari i Kuvendit Ilir Meta, i cili e cilësoi atë që në mesazhin e parë pas zgjedhjeve. Të vihet re edhe nënvizimi i Lu për faktin që Kosova ka folur për “çështje që shqetësojnë qytetarët e Tiranës”, element ky që u shpërfill nga shumë media, të cilat njësoj si stafi i rivalit të Kosovës, tentuan të parodizonin fushatën e kandidatit të opozitës. Kandidat i cili meriton të përshëndetet edhe sepse në këtë përballje pati nga mbrapa një parti dhe kryetar partie në anemi të plotë politike. Lajm i mirë është se kriminelët që kërcyen nëpër lista kandidatësh do të kthehen në problem mes partive që i vunë dhe faktorit ndërkombëtar.
s.z