Afganistan: Talebanët therin 17 vetë; dyshohet për një plojë ‘mbi motive morale’

Diku, në një cep të Afganistanit të Jugut që është nën kontrollin e talebanëve, këta të fundit kanë vrarë sot 17 civilë; më saktë, i kanë therur. Bëhet fjalë për 15 burra e dy gra. Shumica e agjencive të botës e trajtojnë si një plojë ‘nderi’ këtë krim, por mungojnë raportimet 100% të sakta. Sipas disa dëshmive, viktimat kanë qenë në një party, në një festë me këngë e valle, kur kanë mbërritur ekzekutorët e tyre. Talebanët nuk janë shprehur ende (ata zakonisht nuk vonojnë shumë në rivendikimin e krimeve të tilla), por dyshimet, përveç dëshmive që mbërrijnë nga terreni, ngrihen dhe mbi masakra të ngjashme në të shkuarën, në të cilat viktimat janë ndëshkuar për sjelljen e shthurur perëndimore. Vitin e shkuar, në qershor, në një hotel afër Kabulit, pas një inkursioni të talebanëve në një festë të tillë me ‘rufjanë e prostituta’ që merrnin pjesë në një wild party, gjetën vdekjen 20 vetë. Talebanët nuk mendohen dy herë kur vjen puna për të ndëshkuar bartësit e veseve të perëndimit.

E.G.