7 arsye pse vriten policë sipas një drejtuesi policie

Shemsi Prenci, një nga drejtuesit e policisë që me sa duket e ka gjetur rrugën e sfidës ndaj atyre që e larguan nga posti - duke dalë hapur dhe vazhdimisht në media, ka renditur në një intervistë në TemA arsyet e vrasjeve të punonjësve të policisë. Thotë Prenci:

Së pari, organizata e policisë është një organizatë e ekspozuar në luftën kundër krimit.

Së dyti, organizata e policisë nuk është depolitizuar, pasi përdoret dhe terrorizohet nga politika.

Së treti, organizata e policisë është e tradhtuar. Kur punonjësit e policisë marrin iniciativën për të zbatuar ligjin mbi biznese kriminale, mjafton një telefonatë e pushtetarëve dhe viktimizohen punonjësit e policisë, përjashtuar “KUPOLA”, e cila merr pjesën nga korrupsioni e krimi ekonomik.

Së katërti, punonjësve të policisë nuk iu është siguruar asnjë kusht për të përmbushur detyrën dhe për të siguruar familjen.

Së pesti, karriera në polici nuk bëhet profesionalisht, por nëpërmjet nepotizmit dhe përkrahjeve politike.

Së gjashti, organizata e policisë është e tradhtuar dhe nga vetë “KUPOLA” që e drejton Policinë e Shtetit, kjo sepse ata punojnë vetëm me urdhra politikë.

Së shtati, punonjësi i policisë në cilindo rol apo pozicion që të jetë kërcënohet me vendin e punës nga deputetë, zyrtarë të lartë të shtetit dhe fëmijët e tyre që kërcënojnë në emër të baballarëve. a.n.