“Shqipëria në BE, por të ruajë karakteristikat e veta të Lindjes”

Flasim shpesh për ambasadorët e Perëndimit në Shqipëri, por rrallë ose asnjëherë nuk u dëgjohet zëri ambasadorëve të vendeve të Lindjes. Dhe ata ndoshta kanë mendime disi të ndryshme për integrimin e Shqipërisë, përshembull. Të paktën kështu duket nga një intervistë në shtypin e sotëm me ambasadoren e Egjptit në Tiranë, Amina Gomaa, e cila e përfundon mandatin e saj 4 vjeçar pas rreth një muaji- siç raporton e përditshmja “Shekulli”. Pasi rrëfen që 4 vite më parë, që në ditët e nisjes së mandatit diplomatik, i vodhën portofolin në tregjet e Tiranës, se falet 5 herë në ditë në rezidencën e saj, se pëlqen udhëtimet në Dajt dhe Osum dhe se është e dashuruar me gjiret e jugut shqiptar ku bashkohet mali me detin, znj.Gomaa jep edhe një vlerësim politik për integrimin e Shqipërisë në BE: “Shpresoj dhe uroj që ky vend të përmbushë të gjitha kriteret për të hyrë në BE. Por paralelisht me këtë shpresoj që kur të bëheni pjesë e BE-së të ruani karakteristikat shqiptare” – dhe më poshtë, duke sqaruar çfarë ka parasysh me këto karakteristika, thotë: “...Shqipëria është një vend mes Lindjes dhe Perëndimit dhe unë uroj që karakteristikat e një vendi lindor të ruhen edhe kur të bëheni pjesë e BE-së”. Ca më tutje jep një vlerësim për Berishën dhe thotë: “..Kryeministri është një person shumë korrekt shumë mikpritës dhe aspak arrogant”. (A.N.)