“Ka-qi, Ka-qi… Është fjala për Islamin” – ironizon Baze mitingun e PD dhe shton: Basha, kryetari i PD, pas humbjes

Mitingu i çeljes së kësaj fushate elektorale nuk ishte një miting që kërkonte të shquante fitimtarin e zgjedhjeve, por një miting që kish bërë kujdes të shquante trashëgimtarin e partisë pas humbjes. Ai ishte risia e vetme e asaj feste të zymtë. Ah, po. Ishin dhe thirrjet Ka-qi, Ka-qi… Është fjala për Islamin – komenton Mero Baze mitingun e kësaj mbrëmjeje në Tiranë ku PD ka çelur zyrtarisht fushatën elektorale.

Baze e quan këtë miting “mitingun e testamentit”: “Nëse kish një gjë që binte në sy në mitingun e çeljes së fushatës elektorale të PD-së, ishte fakti që Berisha po transferonte testamentin për PD-në tek Lulëzim Basha. Disa mijëra nëpunës me fytyra të lodhura dhe militantë nga periferitë e Tiranës, ishin dekori në të cilin u krye ky rit. Lulëzim Basha u shfaq para dëshmitarëve si njeriu që u jepte atyre shpresë të përballonte Edi Ramën në opozitë. Ai, siç e theksoi dhe vetë, do ta quante tani e tutje Edi Ramën “armik” të tij, të PD-së dhe të shqiptarëve. Edhe pse nuk ish në gjendje të formulonte një filozofi të tij si lider i opozitës së nesërme, Basha u pa qartë se ndjehej i emëruar në detyrë qysh sonte – shkruan Baze. (a.n.)

http://www.gazetatema.net/web/2013/05/13/mitingu-i-testamentit/