Fenomeni Fatos Nano – Rikthimi

Fatos Nano, zhgënjeu kë mendonte se është shndërruar në ‘gjarpër uji’. Gjarpër uji, në rini mbiquanim atë gjarprin e parrezikshëm që na dilte shpesh nëpër liqenet artificiale ku laheshim rregullisht. Trembte shumë, por nuk kafshonte dhe ne e dinim paraprakisht, që edhe nëse kafshonte, nukkish‘helm’ dhe ishte pra, i parrezikshëm.

Fatosi që fliste shpenguar te salloni i Fevzos, të rikujtonte një politikan të strukturuar dhe të vendosur, i cili me sa duket, ka ndërmend seriozisht të ‘mbathë opingat’ e politikbërjes aktive.

Dilema që shtrohej deri para pak kohësh, nëse Fatosi, do të vijonte skemën e fishekzjarreve, shkrepe një herë në vit dhe largohu një vit, duket se po merr një kthesë tjetër.

Në analizën, theksoj, të strukturuar, që ai parashtroi pak orë më parë, duket qartazi që ka ndërmend të rrisë me durim dhe hov, një ngrehinë të mirëfilltë kundërshtare, ndaj Kryetarit të tanishëm të Partisë Socialiste, Edi Rama.

Babai, apo Vëllai i Madh, shpalli dje se ndjehet i kthyer në gjirin e Familjes Socialiste. Ai bëri të ditur se kërkon me ‘letra në dorë’, ‘voce in capitolo’, parashtrimin e tij, në bilancet politike dhe elektorale të lidershipit të ri, që simbas Fatosit, tanimë është një lidership i konsumuar nga humbjet e shpeshta dhe mbi të gjitha nga mungesa e kapaciteteve fituese në të ardhmen.

Duke u prirur nga taktika komunikative e shpalosjes vetëm të majës së ajsbergut, kujtojmë se raporti: majë e dukshme-trup i padukshëm, i ajsbergut, është 1/9, pra një pjesë sipër ujit dhe 8 pjesë nën ujë, Fatosi pra, qëllimisht la të hapur paradoksin: ‘Me Partinë Socialiste, kundër Edi Ramës’.

Por me ‘kundër’, thekson Fatosi, bëhet fjalë për shërim, për shëndoshje dhe ringjallje. Pra i kthyer ose në kthim, tek Familja e Vjetër, Fatosi nuk i bie me shkelm derës, por në fakt po troket në të.

Një trokitje e fortë dhe e rëndë, por gjithmonë një trokitje. Veprim padyshim i mençur dhe i menduar mirë. Nëse ndaj kësaj trokitjeje, Edi, nuk do të dijë të reagojë në të njëjtin stil dhe do të shpalosë shenja nervozizmi dhe përjashtimi, duke e lënë ‘jashtë’ me vrazhdësi Babain apo Vëllain e Madh, do të krijonte padyshim pasoja për popullaritetin e tij elektoral.

Veprimi politik i Fatosit, me nuanca të ndjeshme njerëzore, përqendrohet në një tezë, që formëson një Ngërç me jehonë transversale: ‘Ofroj kontributin tim, për të shndërruar Partinë time të zemrës, në një parti fituese…’

Kundrejt kësaj ‘oferte’ të ashpër dhe kritike, por njëkohësisht të ‘ngrohtë’, në emër të ‘Fitores’ të së Majtës, Rama ka deri më tash, pak hapësira mohimtare. Sepse të gjithë e dinë, të gjithë socialistët e dinë, të gjithë analistët e dinë, që pa pranimin e kësaj oferte, si dhe pa koordinimin politik me Metën, e Majta, ka pak shanse të bëjë dot një rokadë pushteti.

Akuza e Fatosit, ‘diagnoza’ e tij, se ‘Përçarja’, ‘Mosintegrimi’ i të gjitha energjive të Majta, pavarësisht marrëdhënieve apo mosmarrëdhënieve midis tyre, është një dhuratë e përhershme pushteti për kundërshtarin.

Për sa kohë e Majta, është kështu si ka qenë këto vitet e fundit, ose sëpaku që nga viti 2007, sondazhet dhe analizat strukturore, japin fitues Berishën dhe koalicionet e tij pragmatiste. Poli i forcës qëndron dhe do të qëndrojë te Partia Demokratike, e udhëhequr me dorë të hekurt nga Kryetari i saj i përhershëm dhe i padiskutueshëm. Ndonëse ky nuk është një kompliment për Doktorin, është, duam s’duam, një realitet fitues në standardet kulturore dhe politike të Shqipërisë.

Rama pra, me ‘Rikthimin’ e Nanos, mbetet sërish në udhëkryq. Shishet me verë të rrëkëllyera në darkën për nder dhe kënaqësi të Presidentit Nishani, ndërmjet Berishës dhe Metës, davaritën edhe më, iluzionin e ngrehinës së vizatuar në ‘Darkën e Ngjalave’ te Gjiri.

Në 2013, Rama ndoshta do të jetë pa Metën dheMetado të mund të jetë me Berishën.

Rama do të ketë përballë ose në krah, Fatosin, me bluzën e bardhë të ‘shëronjësit të sëmundjeve’ të Edit. Dhe kjo është një Zgjedhje e vështirë.

Fatosin në krah apo përballë?

Metën, në krah apo përballë?

Vera e shumtë dhe e shtrenjtë e ‘Sofrës së Ariut’, ndoshta i ngordhi ngjalat e Gjirit. Berisha dheMeta, u larguan të qeshur dhe paksa çakërqejf.

Mjeku Fatos me bluzë të bardhë, u rikthye dhe bëri publike formulën që të gjithë në PS e pëshpërisin pas krahëve të Ramës.

‘Bashkimi’ përkundrejt ‘Përçarjes’, kësaj lëngate që ka lënë kaq vite në Opozitë, Opozitën duhet një ditë të bëhet realitet.

Jo me kazëm, jo me bajonetë, jo me llagëme të nëndheshme, jo me topa e barut, me stetoskop dhe bluzë të bardhë, lë të kuptojë Fatosi. Kjo do ai që të jetë qasja e tij politike, në të Majtën politike. E thënë ndryshe, trokitja Fatos, si e thamë edhe më lart, kërkon një hapje të derës dhe jo një shembje të ‘Shtëpisë Socialiste’.

Sigurisht edhe Berisha, duke ndjekur në tv, njeriun me bluzë të bardhë, që mjek nuk është, por foli si i tillë, për Partinë Socialiste, për Ekonominë Shqiptare, për Krizën dhe për keqqeverisjen e tij kryeministrore, natyrisht, nuk mori kënaqësinë e parashikuar.

Fatosi kundër Ramës?

Po, por kundër disa sëmundjeve anti-elektorale të tij. Një antagonizëm i pjesshëm dhe jo total. Një antagonizëm si të thuash i riparueshëm, sëpaku në dukje ndërmjet Fatosit dhe Ramës.

Fatosi kërkon ndoshta tinëzisht të akumulojë kredite politike majtas?Apomos vallë është kjo e tija një taktikë e dyfishtë? Godet Qeverinë Berisha, sepse po synon seriozisht kryesimin e Partisë Socialiste?

I freskët, tanimë i pakonsumuar, si një mungues aktiv në politikë, Nano ndoshta u shfaq më i butë, por ndoshta më i rrezikshëm.

Jo vetëm për Edi Ramën.

Marrë nga Mapo