Blloku Politikë

Demokratët kërkojnë mandatin e Valentina Leskajt, fill pasi denoncuan se konçensionin e segmentit hekurudhir Ballsh-Fier-Vlorë e fitoi djali i saj. Sipas një deklarate të Arben Ristanit, nënkryetarja e Kuvendit është në konflikt interesi pasi fëmija madhor i deputetit specifikohet në ligj që nuk mund të përfitojë nga asetet publike. “Zonja Leskaj është në shkelje të Kushtetutës, në nenin 71 të ligjit themeltar të shtetit”, tha Arben Ristani, sipas të cilit PD do të dorëzojë sot në kuvend një kërkesë për dorëzimin e mandatit të deputetes së Vlorës, Valentina Leskaj.

Ndriçim Kulla shkruan sot në gazetën “Mapo” një opinion që i dedikohet ministrit të Jashtëm, Ditmir Bushati, të cilin e quan ministër të Përjashtëm. Kulla, që ka punuar vetë pranë Presidentit aktual të Republikës, zbardh në këtë shkrim,mpërveç pikëpamjeve, edhe ndonjë gjë që e di për shkak të punës. Por nuk tregohet shumë i ashpër pasi mjaftohet që ta quajë Bushatin thjesht “të papërshtatshëm”. Përveç faktit se ky i fundit ka një përvojë “vërdallosjen nëpër OJQ”, Kulla mendon se ai është krejt jashtë funksioneve në detyrën e tij.

Nga fondet e Agjencisë për Mbështetjen e Shoqërisë Civile, ka përftuar edhe FRESSH në shkelje të ligjit, por AMSHC u ka dhënë fonde po ashtu shoqatave me projekte të padobishme. Kryetarja e Komisionit të Shëndetësisë, Albana Vokshi, ka publikuar dje listën e organizatave joqeveritare që kanë përfituar fonde, ku spikasin edhe projekte qesharake si një fond 18 milionë lekë për shoqatën IDC, me projektin: “Kariesi nuk është destin për personat me aftësi të kufizuara. Ai mund të luftohet duke krijuar shprehitë e duhura”.

Eduard Ndocaj merr zhgënjimin e parë edhe nga opozoita meqënëse nga Partia Socialiste dhe Edi Rama ka kohë që ka humbur besimin. Ai ka komentuar në faqen e tij në facebook, qëndrimin e anëtarëve të djathtë në Komisionin Qëndror të Zgjedhjeve, duke i dhënë vetëm një shpjegim, opozita nuk e ka seriozisht dekriminalizimin, pra largimin e deputetëve me rekorde kriminale dhe afrimin e njerëzve të punës në parlament.

“Lajmin e votimit tim nga KQZ e mora ne pune duke filluar nje kantier te ri. Ky eshte nje shembull edhe per koleget e mi qe me pune duhet te ecim gjithmone me pune.

“Panorama” shkruan sot se deputetët socialistë i kanë kërkuar kreut të Grupit Parlamentar, Gramoz Ruçi, që vota e tyre të jetë e unifikuar me LSI në seancën plenare të votimit për ndryshimet në Kodin Penal ku kërkohet ashpërsimi i ndëshkimeve ndaj kontrabandës dhe informalitetit. Kreu i Komisionit Parlamentar të Ekonomisë, Erjon Braçe, i kërkoi Ruçit që të shihet mirë ky ligj pasi ka marrë edhe shqetësime të deputetëve për ashpërsimin e tij.

Arben Ndoka ikën dhe në vend të tij vjen Eduart Ndocaj. Komisioni Qendror i Zgjedhjeve i dërgoi sot Parlamentit emrin e tij si zëvendësues i Ndokës, që dorëzoi mandatin më 7 shtator të këtij viti përmes një letre publike. Vendimi në KQZ e bën edhe më qesharake situatën pasi ai u mor me 4 vota pro dhe 3 kundër. Nuk dihet se pse është kundërshtuar nga 3 anëtarë marrja e mandatit nga Ndocaj, kur formalisht atij i takon. Sipas listës së PS-së në qarkun Lezhë, mandati i takonte Ndrec Dedajt, po ky i fundit nuk pranoi të japë dorëheqjen si kryebashkiak i Mirditës.

Një tjetër akuzë për përfitime pa tender për miqtë politikë të kryeministri Rama ka bërë sot Partia Demokratike. PD denoncoi marrjen me koncension nga Arian Leskaj, djali i deputetes së PS-së, Valentina Leskaj të hekurudhës Ballësh- Vlorë për 25 vjet.

Në konferencë për shtyp deputetja e Vlorës, Liljana Elmazi tha se fituesi është shpallur pa tender.

Kryeministri Edi Rama paralajmëroi se Shqipëria mund të preket nga fluksi i emigrantëve që përdorin si rrugë kalimi vendet e Ballkanit për të shkuar drejt vendeve të zhvilluara europiane. Kreu i qeverisë ndodhej në Bruksel për samitin e organizuar nga Presidenti i KE, Jean Claude Juncker dhe Kancelarja e Gjermanisë Angela Merkel, me fokus krizën e refugjatëve. Në fotot e publikuara në profilin e tij në rrjetin social “Facebook, Rama shihet se ka pasur edhe një takim me kryeministrin serb, Aleksandër Vuçiçi edhe pse nuk ka njoftime mbi temën e diskutimit mes tyre.

Ilir Meta i ka dhënë një intervistë gazetës “Illyria” dhe radio “Kosova”. Me një lloj interesi paraqitet deklarata e Metës për marrëdhëniet brenda koalicionit dhe kërkesa e tij për ndryshime në qeveri. Meqenëse pazari i Bllokut ka ecur jo keq, Meta ka menduar të bëjë një lloj tërheqje. Thotë kreu i LSI-së: “Kjo është një marrëdhënie e vazhdueshme, e përditshme. E rëndësishme është që drejtimet kryesore strategjike janë të dakordësuara. Çdo debat i ditës nuk konteston dhe nuk vë në pikëpyetje këto raporte, nuk vë në pikëpyetje këtë koalicion.

Tendenca për ta prezantuar Shqipërinë si një vend në dyert e Europës vetëm sa ekspozon vendin dhe qeverinë pasi në kushtet kur renditemi të parët për numrin e azilkërkuesve pas Sirisë, çdo diskutim është i tepërt. Eupopianët mundohen ta thonë në mënyrë sa më elegante sa për sa kohë eksportojmë azilëantë nuk kemi shance të përfitojmë nga politikat e Zgjerimit. Zv/kryetar i komisionit të punëve të jashtme në PE, Andrej Plenkovic thotë se kriza e emigrantëve do të jetë me pasoja për të ardhmen e Europës.