Blloku Ekonomi

Kuvendi pritet të miratojë shtyrjen e radhës së afatit të vlefshmërisë së bonove të privatizimit deri në vitin 2027. Bonot, të cilat shumë familje shqiptare i kanë që në vitet ‘90, kur u shpërndanë me qëllim përdorimin e tyre për privatizimin e ndërmarrjeve shtetërore, sipas ekspertit Elvin Meka mund të përdoren për rreth 1200 objekte të ushtrisë.

Shtetet e Bashkuara të Amerikës kanë shtuar presionin ndaj bizneseve europiane që vijojnë të bëjnë biznes me Rusinë, apo në Rusi. “Politico” raporton se së fundmi, subjekt i këtij presioni është edhe banka austriake “Raiffeisen”, teksa në në një takim të zhvilluar së fundmi mes Ndihmës Sekretarit në Detyrë për Thesarit, Anna Morris dhe zyrtarëve auatrikë, janë vënë në dukje pasojat e nxjerrjes së bankës në fjalë nga sistemi financiar amerikan.

Në Norvegji, gjatë vitit që lamë pas, kulturat e salmonit kanë pasur humbje të mëdha. Sipas një raporti të Institutit Veterinar Norvegjez, 62.7 milionë salmonë kanë ngordhur në ferma në të ashtuquajturën 'faza e detit', pra në atë në të cilën peshqit jetojnë brenda gardheve të instaluara në zonat bregdetare. Shkalla e vdekshmërisë ishte 16.7%, duke shënuar një rritje si në terma absolute ashtu edhe në përqindje (në vitin 2022 shkalla ishte 16.1%).

Prej disa javësh tashmë është duke u zhvilluar një protestë e banorëve të zonave të Lumit të Vlorës për ndërtimin e një ujësjellësi që do të çojë ujin në Himarë. Përmes disa kronikave televizive mund të shihen banorë të zonës që paralajmërojnë përshkallëzim të protestës dhe se përmes këtij ujësjellësi do të cenohet e gjithë zona. Në vitin 2022, në të njëjtën zonë pati një tjetër reagim - atëkohë për ndërtimin e katër hidrocentraleve në lumin në fjalë – duke sinjalizuar kështu për interesa të mëdha që lobojnë për pasuritë e zonës. 

Një treg droge me vlerë miliarda euro ka vënë në lëvizje një makineri dhune të paprecedentë në Europë. Bëhet fjalë për rreth 30 miliardë euro që qarkullojnë çdo vit, shifër kjo e përllogaritur nga Europoli dhe Qendra Evropiane e Monitorimit për Drogën dhe Varësinë nga Drogat (EMCDDA). Importet e kokainës dhe eksportet e ekstazisë arritën secili shifra rekord në vitin 2022.

Alexis Goosdeel, drejtori i EMCDDA, e krahason nivelin e dhunës që ka gjeneruar ky treg me situatën në Amerikën Qendrore.

Qeveria është tërhequr nga propozimi për taksimin e qytetarëve që japin me qira vila apo apartamente përmes platformave si AirBnB apo Booking. Ministria e Financave njoftoi sot se drafti fillestar për turizmin, ku përfshihej regjistrimi i të gjitha njësive akomodues si biznese në QKB, do të ndryshohet.

Këshilli i Bashkimit Evropian dhe Parlamenti Evropian arritën një marrëveshje të përkohshme për të ndaluar hyrjen e produkteve të prodhuara me punë të detyruar në tregun e përbashkët evropian.

Marrëveshja përcakton përgjegjësitë që Komisioni i BE-së dhe shtetet anëtare kanë në identifikimin e kompanive që shfrytëzojnë punëtorët e detyruar dhe ndalojnë produktet e tyre.

Sipas ministrit të Ekonomisë dhe Punës në Belgjikë, Pierre-Yves Dermagne, marrëveshja ka për qëllim të prishë modelin e biznesit të këtyre kompanive.

BE-ja duhet të përgatitet për skenarin "më të keq" për furnizimet me gaz rus. Kriza e pritshme lidhet me skadimin e marrëveshjes së tranzitit midis Moskës dhe Kievit, që pritet në fund të vitit.

Paralajmërimi vjen nga një dokument i brendshëm i Komisionit të BE-së.

Mbi 959 miliardë dollarë janë përdorur nga institucionet financiare në mbarë botën për të mbështetur prodhimin dhe tregtinë e armëve. Më shumë se gjysma e totalit të investimeve në industrinë e mbrojtjes vjen nga SHBA, ndërsa 79 miliardë vijnë nga 10 investitorët kryesorë evropianë. 15 bankat më të mëdha evropiane investojnë në kompanitë e prodhimit të armëve për një total prej 87.72 miliardë eurosh.

Në një analizë të publikura në revistën “Monitor”, Guernatori i Bankës së Shqipërisë, Gent Sejko, ka përcjellë disa mendime mbi qëndrimin e Bankës për forcimin e lekut gjatë vitit që lamë pas. Duke marrë në shqyrtim dy argumente që janë hedhur gjerësisht për këtë temë nga shumë ekspertë, pra përmirësimi strukturor i ekonomisë dhe paraja informale, Sejko nënvizon se forcimi i monedhës sonë, ka ardhur për shkaqe të matshme të ekonomisë legale.