Blloku Bota

Shteti Islamik ka ndryshuar mënyrën e operimit dhe sipas informacioneve ka arritur kapacitetin e veprimit në shkallë ndërkombëtare. Kjo rezulton nga një përmbledhje e takimit mes ekspertëve të Europol, mbajtur në datat e 29 dhjetor-1 dhjetor 2015, e cila evidenton po ashtu se ISIS ka ngritur kampe stërvitore të vogla në Europë, por edhe në vende të Ballkanit.

“Ju kërkoj të luteni për mua”. Kështu iu drejtua presidenti iranian, Hasan Rouhani, Papa Françeskut, gjatë një vizite në Vatikan. Ky është takimi i parë mes një presidenti iranian dhe Papës që nga viti 1999. Takimi ka zgjatur 40 minuta dhe siç raportohet Papa i ka dhënë Rouhanit një medalje me imazhin e Shën Martinit që ndihmon një njeri të varfër. Vizita shihet ndër të tjera si një lëvizje e Iranit për të rivendosur lidhjet ekonomike dhe të energjisë me Europën, me të cilën ka një traditë shumë të madhe bashkëpunimi.

Një shkrim i para tri ditëve në gazetën amerikane “New York Times” provon atë që përflitej prej kohësh për krizën siriane. Shërbimi sekret amerikan, CIA, ka bashkëpunuar me sauditët për të stërvitur dhe pajisur me armë e logjistikë rebelët sirianë që luftonin kundër regjimit të Bashar Al Assad. Situata bëhet e sikletshme po të kujtojmë se disa muaj më parë, Presidenti amerikan Barack Obama, deklaronte se konflikti mes shitëve dhe sunitëve është kryesori në botë.

"Ne ndodhemi në fillim të një revolucioni, si pasojë e të cilit, mënyra si jetojmë, punojmë dhe veprojmë me njëri-tjetrin do të ndryshojë në mënyrë rrënjësore", tha organizatori i Forumit të Davosit Klaus Schwab. Fjala është për Industrinë 4.0 - pra për prodhimin e drejtuar nga kompjuterat, të automatizuar plotësisht dhe të lidhur në rrjet, dhe me përhapjen gjithnjë e më të madhe të teknologjisë edhe në sektorin e shërbimeve - për shembull përmes robotëve.

Miliarderja kineze Zhang Xin, ka folur në një intervistë për gjermanen “Spiegel” rreth asaj që pritet ndodhë me ekonominë kineze. Sipas Xin, Kina duhet të kalojë drejt një ekonomie konsumi dhe shërbimesh, duke patur përherë parasysh se në botën që jetojmë: “Asnjë ekonomi, apo kompani, si dhe individ nuk mundet të zhvillojë plotësisht potencialin e vet pa përqafuar dy prirje themelore:  globalzim dhe dixhitalizim”. Në këtë kuptim, “Kina ka nevojë të vijojë të hapet dhe të ndërlidhet”. “Ajo ka nevojë të kuptojë se bota është bërë një. Era e izolimit ka përfunduar”, vijon miliarederja kineze.

Pamja e vendeve arabe sot të frikëson: Dhunë, luftë dhe shkatërrim. Në kohën që pranvera arabe filloi, intelektualët shpresuan për ndryshim. Pesë vite më pas, 10 prej tyre flasin për The Guardian.
Në janar të vitit 2011, disa ditë pas ditë pas kryengritjes së parë në Tunizi dhe nisjes së protestave në Sheshin Tahrir, “The Guardian” ftoi shkrimtarët kryesorë nga e gjithë bota arabe për të reflektuar mbi revolucionionin gjithëpërfshirës në rajon. Atëherë, ata shprehën optimizëm të madh për të ardhmen.

Rënia e besimit te Zoti, ideja se jeta, Toka, gjithçka është krijuar nga një forcë superiore duket se në disa vende është histori. “Washington Post” sjell si shembullin më domethënës Islandën, një vend ku vetëm “20 vite më parë, afërsiht 90% e banorëve ishin besimtarë”. “Sot, më pak se 50% e tyre janë të tillë”, shkruan WP. Me këto shifra, edhe sipas Gallup, Islanda bën dallim nga pjesa tjetër e botës.

Presidenti kinez Xi Jinping bëri thirrje nga takimi i Ligës Arabe në Kajro të Egjiptit për krijimin e shtetit palestinez në kufijtë e para luftës së vitit 1967. Po kështu Jinping theksoi se për shtetin e ri palestines si kryeqytet mund të shërbente Jerusalemi Lindor. “Haartez” vlerëson se kjo qasje e Kinës lidhet me zgjerimin e synimeve të saj në rajonin e Lindjes së Mesme.

Vrasja e ish-agjentit rus Aleksandër Litvinenko në vitin 2006, ishte e miratuar nga presidenti Vladimir Putin. BBC. shkruan se ky është një nga përfundimet e hetimeve nga autoritetet britanike.Litvinenko vdiq në moshën 43 vjeçare në Londër në vitin 2006, pak ditë pasi u helmua me polonium radioaktiv-210, të cilin ai besohet ta ketë pirë në një filxhan çaji.

Europa ndodhet në prag të një krize që rrezikon zhbërjen e një prej arritjeve kryesore të saj: lëvizjen e lirë brenda hapësirës Shengen. “Deutsche Welle” citon Presidentin e Këshillit Europian, Donald Tusk, të jetë shprehur se “ka vetëm dy muaj kohë për të vënë gjëray në kontroll”. Përndryshe, mosmenaxhimi i krizës së refugjatëve do të sillte kolapsin e udhëtimit pa pasaportë në Shengen. Po kështu Tusk sheh rrezik edhe përrpjektin europian në tërësi, nëse kufijtë e jashtëm të unionit nuk do të arrijnë të menaxhohen.