Blloku Bota

Kompania e njohur “Johnson & Johnson” është gjobitur me 72 milionë dollarë nga një gjykatë në Misouri, pas akuzës se produktet e saj kishin provokuar kancer vezoresh te një femër e cila vdiq në tetor të vitit 2015 në moshën 62 vjeç. Jacqueline Fox nga Alabama, kishte përdorur “Baby Powder” dhe “Shower to Shower” për higjenë intime për rreth 35 vjet dhe u diagnostikua me kancer vetëm tre vjet më parë. Ndaj kompanisë ka patur ankesa edhe më herët, e cila nuk ka njoftuar konsumatorët se produktet e saj me bazë talku mund të shkaktojnë kancer.

Nesër zhvillohet në Vjenë një konferencë e përbashkët mes Austrisë dhe vendeve të Ballkanit Perëndimor, përfshirë Bullgarinë, në nivel ministrash të Jashtëm dhe të Brendshëm. Takimi organizohet nga pala austriake dhe në të njoftohet se janë ftuar të marrin pjesë ministra nga Shqipëria, Bosnje - Hercegovina, Kroacia, Kosova, Maqedonia, Mali I Zi, Serbia dhe Sllovenia.

Zgjedhjet e fundit parlamentare në Siri janë zhvilluar 4 vjet më parë, pas të cilave u përshkallëzua konflikti i armatosur mes rebelëve opozitarë dhe forcave të presidentit Asad. Ndonëse vendi i tij është kthyer në një shesh lufte, presidenti i Sirisë ka shpallur 13 Prillin si datën e zgjedhjeve presidenciale. Menjëherë pas këtij vendimi, Shtetet e Bashkuara dhe Rusia njoftuan arritjen e armëpushimit që prej datës 27 shkurt, marrëveshje e cila nuk përfshin luftën kundër Shtetit Islamik apo organizatës Al Nusra.

Maqedonia nuk ka përmbushur kushtet për zgjedhje të parakohshme parlamentare më 24 prill, ashtu siç parashikohej me marrëveshjen mes liderëve politikë. Ky është konkluzioni i faktorit ndërkombëtar të cili e bëri publik ambasadori i Shteteve të Bashkuara të Amerikës në Maqedoni, Xhejms Bejli.

Arabia Saudite është një ndër aktorët kryesorë të luftës që zhvillohet në Siri. Axhenda e saj është shumë e qartë, ndoshta më e qarta ndër të gjitha axhendat: largim i Bashar Al Asadit nga pushteti dhe ndërprerja e një aksi shiit në Lindjen e Mesme. Në një intervistë për revistën e njohur gjermane “Spiegel”,  ministri i Jashtëm saudit,  Adel al-Jubeir, ka deklaruar se vendi i tij mbështet Procesin e Vjenës dhe se në persepktivë është e qartë se Siria do të jetë pa Assadin.

Rzultati i arritur nga Donald Tramp në Karolinën e Jugut vërtetetoi se ai është kandidati kryesor i republikanëve për zgjedhjet presidenciale në Shtetet e Bashkuara, të cilat do të mbahen në nëntor. Ai dominoi lehtësisht ndaj rivalëve brenda partisë, duke marrë rreth 32% të votave kundrejt 22.4% të senatorit të Floridas, Marko Rubio dhe 21% të siguruara nga senatori i Teksasit, Ted Kruz. Karolina e Jugut konsiderohet si një elektorat konservator dhe në rezultat kanë ndikuar edhe deklaratat e Tramp ndaj Papa Françeskut.

Ka krijuar debate të mëdha vendimi i Apple për të mos pranuar kërkesën e Byrosë Federale të Hetimit(FBI) për  zhbllokimin e iPhone të Syed Farook, që medohet se është i përfshirë në sulmet terroriste të fundvitit në San Bernardino në SHBA. Në një letër të hapur që u publikua gjerësisht, CEO i Apple, Tim Cook, e shpjegonte vendimin e kompanisë me prioritetin që ka privatësia kundrejt sigurisë në një botë që po e vendos njeriun në kushtet e survejimit masiv.

Udhëheqësit e vendeve të Bashkimit Europian janë dorëzuar para presionit të vazhdueshëm të Britanisë për të ndryshuar statusin e ishullit brenda Unionit në këmbim të qëndrimit të saj në BE. Bisedimet që zgjatën më shumë se 30 orë në Bruksel përfunduan me një marrëveshje të re që i jep Britanisë një status të veçantë brenda Bashkimit Europian.

Shpërthimi i fundit në Ankara dhe sulmi ndaj autokolonës ushtarake turke duke se po i hap rrugë një ndërhyrje ushtarake të Turqisë në Sirinë veriore, me qëllim aneksimin e saj. Analistët shkruajnë se si Turqia ashtu dhe Arabia Saudite janë të inteteresuara të ndërhyjnë me operacione nga toka në Siri, duke parë interesat e tyre.
"Synimimi i Erdogan është aneksimi i pjesës veriore të Sirisë, edhe pse zyrtarisht Akaraja e ka mohuar një gjë të tillë" - thotë për agjencinë ruse "Sputinik"' analisti i çështjeve gjeopolitike, Maikëll Kosudofski.

Një bombë me telekomandë vuri  në shenjestër-mengjesin e së enjtes disa makinë të ushtrisë turke në provincën juglindore të Dijarbakërit, në Turqi. Të paktë shtatë ushtarë humbën jetën. Ngjarja vjen një ditë pas sulmit me autobombë në Ankara ku humbën jetën 28 persona dhe u plagosën mbi 60 të tjerë, jo shumë larg ndërtesave të ministrive, parlamentit dhe shtabit të përgjithshëm të ushtrisë. Atentatori i sulmit kamikaz quhet Saleh Nexhar (Saleh Nejar) dhe është anëtar i  milicisë kurdo-siriane YPG, që kishte hyrë në Turqi, me valën e emigrantëve.