Kryebashkiaku Erion Veliaj u distancua nga drejtorët e institucionit që ai drejton, nën akuzën e SPAK për korrupsion. Veliaj foli për herë të parë në mënyrëtë drejtpërdrejtë për arrestimin e tre drejtorëve të Bashkisë Tiranë, duke u justifikuar se nuk është në tagrin e një drejtuesi që merret me “një mijë e një problemet e përditshme të punës”, të përgjojë zyrtarët në varësi të tij.

Këshilli për të Drejtat e Njeriut në Organizatën e Kombeve të Bashkuara ka adoptuar një rezolutë përmes së cilës bën thirrje për gjykimin e Izraelit për krime lufte në Gaza. Gazeta britanike “The Guardian” e cilëson rezolutën “një tjetër moment në izolimin gradual global të Izraelit” për shkak të luftës në Gaza gjatë së cikës vlerësohet se kanë humbur jetën 33 mijë njerëz. 

Në numrin e fundit të revistës “Balcanica”, botim i Akademisë serbe të Shkencave, akademiku rus, Andrey Edemskiy prezantohet me punimin: Plani Chivu-Stoica(shtator 1957). Një hap në rrugën drejt “Ballkanit të Hapur”. Titulli është me natyrë provokative, pasi në pamje të parë sugjeron analogji mes një propozimi rumun të vitit 1957 dhe nismës së Ballkanit të Hapur që dëshmuam këto vite e që origjinoi në Beograd.

Sekretarja e Thesarit e SHBA-së, Janet Yellen, ngre shqetësimin e dominimit në rritje të prodhimit kinez. Yellen vuri në dukje rrezikun e mbiprodhimit nga prodhuesit kinezë, të cilët kanë eklipsuar kompanitë amerikane.

Turqia ka vendosur tërheqjen nga Traktati mbi Forcat e Armatosura Konvencionale në Europë. Përmes një dekreti të publikuar në gazetën zyrtare, presidenti turk, Recep Tayyip Erdogan ka autorizuar daljen e Turqisë nga një traktat përmes të cilit kufizohen numrin e armëve dhe pajisjeve ushtarake për pesë katgori bazë: tanket, mjetet e blinduara, sistemet e artilerisë me kalibër 100 mm e sipër, avionët dhe helikopterët.

Britania e Madhe do të largohet nga skema e shkëmbimit studentor të BE-së Erasmus+. Shkak i vendimit janë bërë aftësitë e dobëta të britanikëve në gjuhët e huaja, të cilat e kanë bërë anëtarësimin shumë të shtrenjtë për t'u justifikuar.

Për shkak të përvetësimit të ulët të skemës nga studentët britanikë në krahasim me kombësitë e tjera - i kushtëzuar nga aftësitë e dobëta për të mësuar gjuhë – Lodrës i duhet të paguajë gati 300 milionë euro më shumë në vit sesa merr.

Mediat në Kosovës raportojnë për tërheqjen e regjistruesve serbë nga procesi i regjistrimit të popullsisë. Në komunën e Zubin Potokut kanë qëndruar në detyrë vetëm dy regjistrues serbë, çka sinjalizon probleme në proces. Vendimi vjen ndërkohë që autoritetet kosovare kanë deklaruar se kanë rënë dakord me propozimin europian për dinarin ndonëse pala serbe ka refuzuar të pranojë një marrëveshje për këtë gjë.

Prokuroria serbe për krimet e luftës i kërkoi Gjykatës së Lartë të Beogradit të dënojë me burg nëntë ish-ushtarë të Ushtrisë Jugosllave. Ata akuzohen për krime lufte kundër civilëve në katër fshatra të Kosovës, rreth qytetit të Pejës në pranverën e vitit 1999.

Sipas akuzës, nëntë ish-ushtarë të Ushtrisë Jugosllave duhen dënuar me burg për pjesëmarrje në zhvendosjen e dhunshme dhe vrasjet e civilëve shqiptarë gjatë një sulmi në katër fshatra afër Pejës në prill dhe maj 1999.

Ministria e Financave e Rusisë njoftoi se do të dyfishojë blerjet e valutës së huaj dhe arit përgjatë këtij muaji, një lëvizje që e kombinuar me shitjen e bankës qendrore do t'i çojë ndërhyrjet neto të shtetit në forex gati afër zeros.

Rusia e vlerëson si më të arsyeshmin planin e paqes që ka propozuar Kina. Ministri i Jashtëm rus, Sergei Lavrov, tha se ky është plani më i mirë që është propozuar deri tani.

Pekini parashtroi një dokument prej 12 pikash më shumë se një vit më parë që përcaktonte parimet e përgjithshme për përfundimin e luftës, por nuk hynte në detaje. Plani u prit vakët në atë kohë si në Rusi ashtu edhe në Ukrainë, ndërsa Shtetet e Bashkuara thanë se Kina po përpiqej të paraqitej si paqebërëse, por duke reflektuar "narrativën e rreme" të Rusisë.