Rritja e nivelit të borxhit publik përmes fjalëve 'kyçe': cënim sovraniteti, papërgjegjshmëri, shkombëtarizim, skenari i Greqisë... apo tepër modest?

Sa e si do ndikojë rritja e nivelit të borxhit publik? Diçka mund të kuptohet përmes deklaratave të politikanëve e specialistëve të ekonomisë:

Kryetari i Aleancës Kuq e Zi Kreshnik Spahiu komentoi nga Elbasani edhe vendimin e qeverisë për heqjen e limitit të borxhit, duke theksuar se juridikisht ky venim përbën një cenim të sovranitetit të vendit. (cituar nga SHekulli)

Ben Blushi: “Në 23 qershor janë zgjedhjet, nuk ka qeveri që në 6 muajt e fundit merr borxh. Në 6 muajt e fundit qeveritë mbajnë rendin dhe paguajnë rrogat. S’ka rrugë tjetër për ju, ikni me nder... Ju e keni shkombëtarizuar ekonominë shqiptare, shtoi deputeti socialist, pasi gjithçka po i shitet miqve të qeverisë” (cituar nga Panorama)

Ministri i Financave Ridvan Bode: “Ka qenë i lartë për vendin edhe kur ju u larguat, ndërkohë që borxhi i rajonit ishte 44%, ju e latë me shumë se 50%. Ne e kemi rritur me 3.7%, në periudhën e krizës, po e krahasoj me veten tonë jo me kohën tuaj, ndërkohë që rajoni 11%. Pra për ta mbajtur atraktiv për investime kemi bërë borxh publik tepër modest.” (cituar nga Panorama)

Adrian Civici ...rritja e borxhit publik në 62.6% të PBB, , nënkupton edhe disa rreziqe apo situata të vështira që mund të shkaktohen: së pari, vërtet që tejkalimi prej +2.6% në raport me limitin 60%/PBB nuk duket i madh, por duhet të kemi parasysh se llogaritjet janë bërë mbi bazën e parashikimit për një rritjeje ekonomike prej 4 -4.1% për 2013, shifër kjo e cilësuar si “shumë optimiste”, pse jo dhe disi larg realitetit. Nëse Shqipëria merr borxh por nuk realizon këtë rritje ekonomike, atëherë niveli i borxhit mund të rezultojë mbi 65% dhe kosto e shërbimit të tij shumë e lartë. (cituar nga MAPO)

Deputeti i Partisë Socialiste, Arben Malaj, deklaroi se buxheti i vitit 2013 do të japë një ndikim tepër të keq te qytetarët shqiptarë. Sipas ish-ministrit të Financave, shqiptarët do të trashëgojnë dhe do të duhet të paguajnë nivelin më të lartë të borxhit publik i cili në vitin 2005 ishte 497 miliardë lekë,  ndërsa tani është rritur gati 200%. (cituar nga SHQIP)

Deputeti Pandeli Majko: “Doktori e di ku po e çon Shqipërinë, porse opozita duhet ta ndalojë këtë. Po përpiqet të sjellë në Shqipëri skenarin e Greqisë, ku qeveritë i pasonin njëra-tjetrës borxhe, duke e zhytur vendin në krizë të thellë. Ky projektbuxhet po e çon vendin drejt greminës. Unë nuk e votoj këtë buxhet, më mirë më pak të varfër se të ngremë dolli me djersën e atyre që nuk kanë lindur akoma...” (cituar nga SHQIP)

Kosta Barjaba: “Qeveria po sillet me borxhin në mënyrën më të papërgjegjshme të mundshme. Pasi u orvat të manovrojë me fshehjen e treguesve realë të borxhit, por nuk ia doli, tashmë po bën një manovër tjetër, më të rëndë: po e legjitimon rritjen e borxhit, duke krijuar për të një mbështetje ligjore. Nëse fshehja e borxhit ishte një veprim i dënueshëm moralisht dhe politikisht, ligjërimi i rritjes galopante të borxhit, është një veprim akoma më i rëndë... Borxhi i lartë pa kufi i ngjan një shtrese rëre lëvizëse, e cila vetëm e tërheq ekonominë dhe vendin poshtë e më poshtë.  Shërbimi i borxhit ka thithur financime publike që mund të ishin përdorur për programe dhe investime të tjera publike. Vetëm me pagesën vjetore të shërbimit të borxhit, rreth 600 milionë USD, i cili merret për interesa elektorale dhe do të shtoja edhe klienteliste, të qeverisë, mund të hapeshin nga 30 deri në 40 mijë vende pune në vit... (cituar nga Gazeta Dita)