Vlorë: Meta bëhet opozitar me titull të plotë; dhe është i sigurtë që do të jetë i tillë deri më 23 qershor

“Ne duam një Shqipëri pa politikanë përçarës, të cilët e kthyen para një jave parlamentin në parlamentin e ‘leshit’ dhe sot e kthyen ne parlamentin e ‘veshit’”, tha nga Vlora Ilir Meta, duke bërë ironi me Topallin e parlamentin. Por kjo ishte më e pakta. Më pas, si të ish një ekspert dhe analist i ftohtë, ai i bëri një diagnostikim të saktë maxhorancës “të të tjerëve” që ka qeverisur vendin për tetë vjet me radhë:

“Kush premton 250 mijë vende pune, kur nuk hapi dot 50 mijë në 8 vite, i them se Vlora nuk ngopet me lugën e zbrazët, se Vlora kërkon ndryshim. Shqipëria kërkon një model të ri ekonomik, një ekonomi që eksporton e konkurron. Vlora nuk mund të vazhdohet të qeveriset me lëvdata, kur borxhet ndaj kompanive të punëve publike po shkojnë në 300 milionë euro të papaguara, duke rritur kreditë e këqija; nuk mund të vazhdohet me eufori për ekonominë kur borxhi për mosrimbursimin e TVSH po arrin në 200 milionë euro”.

Dhe më pas i drejtohet personalisht Berishës: “Dua t’i them kreut të PD-së nga Vlora të mos shohë ëndrra me sy hapur që opozita do të bojkotojë zgjedhjet, pasi opozita, Vlora dhe Shqipëria duan që zgjedhjet të bëhen sot…. Ne jemi të sigurt në fitoren e këtyre të zgjedhjeve. Aleanca për Shqipërinë Evropiane e nisi fitoren në Shkodër dhe kulmin do e ketë në Vlorë më 23 qershor. E kemi të pamundur të mundim Berishën në Vlorë 8 me 2, por ju jap fjalën se do e mundim 9 me 3. Ashtu sikurse ju jap fjalën se 12 kandidatët e LSI do jenë djemtë dhe vajzat e Vlorës që qëndrojnë dhe jetojnë me hallet dhe shqetësimet e këtij populli të mrekullueshëm.”

Re.Pu.