Numërimi i votave, kryetarja e KQZ propozon heqjen e komisionerëve partiakë, Denar Biba sugjeron zëvendësimin e tyre me gjyqtarë e prokurorë

Kryetarja e Komisionit Qendror të Zgjedhjeve, Lefterie Luzi propozon heqjen e komisionerëve partiakë nga numërimi i votave, ndërsa anëtari Denar Biba sugjeroi zëvendësimin e tyre me gjyqtarë e prokurorë. Procesi torturues i numërimit dhe i vulosjes së rezultateve në zgjedhjet në Shqipëri, do të ekzistojë për sa kohë nuk kalohet numërimi nëpër qendrat e votimit dhe për sa kohë komisionerët janë partiakë. Ky ishte sugjerimi i kryetares së KQZ, dhënë për “Top Channel”, si përgjigje për pyetjen se përse po zvarritet procesi i numërimit në disa bashki, duke shkelur edhe Kodin Zgjedhor që parashikon përfundimin e procesit 24 orë pas mbylljes së qendrave të votimit. “Nëse numërimi i fletëve të mos bëhej në vende të përqendruara, por në qendra votimi, kalimi në qendrat e votimit, aty ku bëhet votimi do të lehtësonte shumë procesin dhe brenda orës 12 do të kishim rezultatin. Numërimi në qendrat e votimit një dhe komisionerë jopartiakë dy, do të bënte që të kishim një rezultat të menjëhershëm”, deklaroi Luzi. Në zgjatim të kësaj ideje, nënkryetari Denar Biba hodhi disa propozime. “Një strukturë për t’i dhënë përgjigje kësaj, do të ishte trupa e gjyqtarëve dhe prokurorëve të Shqipërisë. Mendo që janë njerëz me përgjegjshmëi shumë të lartë se sa militantët e partive që janë sot. Komisionerë militantë partish, që para se t’i përgjigjen KQZ, u përgjigjen strukturave politike që i kanë çuar në ato vende”, tha Biba. Vetë Luzi shtoi disa praktika europiane në vendet e tjera, ku janë vullnetarë numëruesit, ose zgjidhen me short nga një listë e shoqërisë civile.

l.v