Media nxjerr një listë ministrash të mundshëm... po Ngjela??

Dy të deleguarit e PS dhe LSI, Ilir Beqja dhe Edmond Haxhinasto duket se e kanë përfunduar (ose janë pranë përfundimit) strukturën e ardhshme të kabinetit Rama.

Panorama shkruan se nuk do të ketë një “Superministri të Brendshme”, por një dikaster të Rendit Publik dhe një degë të pushtetit vendor, i cili ende nuk është përcaktuar nëse do të jetë së bashku me Punët Publike, apo do të funksionojë më vete. Një ndryshim pritet të përfshijë edhe Ministrinë aktuale të Kulturës, Turizmit, Rinisë dhe Sporteve, e cila do të ketë një ndarje. Ndoshta Turizmi do të funksionojë me pushtetin vendor, pasi punët koordinohen më mirë, ose do të jetë më vete.

Po sipas Panoramës, në qarqet e mazhorancës po qarkullojnë edhe emrat e parë të përbërjes së kabinetit. Pavarësisht se deklaratat zyrtare thonë se as PS-ja e as LSI-ja nuk ka arritur në fazën e emërimit të kandidatëve për ministra pëshpëritet për disa kandidatë. Kështu nga LSI mësohet se mund të jenë ministra: Lefter Koka (te Transportet), Ylli Manjani, Shezai Rrokaj (tek Arsimi) apo Nora Malaj. Nga PS emrat janë më të rezervuar, por qarkullon gjithnjë e më shumë emri i Sajmir Tahirit në postin e ministrit të Rendit Publik dhe Ditmir Bushatit në atë të Ministrisë së Integrimit. Një nga thashethemet më të forta është ai se Ngjela, në të vërtetë, do të mbetet pa post ministror.

k.c.