Huffpost.com: Ballkani (dhe Shqipëria e Kosova) në sytë e një “turisti” amerikan

“Zagrebi është alamet qyteti, plot me histori; do të ishte mirë të rrinim ca më shumë në atë qytet, por agjenda nuk na lejonte”, thotë në shkrimin e vet të publikuar dje në huffpost.com autori Stewart A. Swerdlow. Ky i fundit ka bërë një udhëtim në Ballkan. S’ka qenë vetëm. Kanë qenë një grup e kanë udhëtuar me makinë nëpër rrugët e gadishullit tonë.

“Beogradi është një qytet i rrëmujshëm dhe si i palidhur. Udhqimi dhe vera serbe ishin fantastike”, shkruan ai për stacionin e dytë të tour-it të tij. Po pastaj? Pastaj vjen Kosova. “Të kaloje kufirin mes saj e Serbisë ishte e sikletshme. Trafiku në Prishtinë ishte i rënduar; ishte si të ishe në Manhattan në orët e ngarkuara të trafikut, veçse semaforët nuk punonin. Duhet të ketë pará të madhe në Kosovë, pasi njerëzit ishin të veshur mirë, kish ndërtime dhe makina luksoze”, thotë autori.

Në Maqedoni, agjenda e udhëtimit e ka dashur që të ndalen në Ohër, dhe përshtypjet s’janë të mira, me rrugë të ngushta, me kamarierë që s’shërbejnë mirë, etj. Por për Maqedoninë ekzistojnë fjalë të mira: “është një vend i mrekullueshëm”.

Dhe ja, ku hyhet në Shqipërinë e mistershme, me çmime të ulta, me zonat e bukura rurale, me rrugë të ngushta, me shoferë që dinë t’ia dalin në këto rrugë, ku mbajtëset në anë të rrugës si zor të të mbajnë. Po Tirana? “Në Tiranë askush nuk flet anglisht (!!), shqipja është një formë e greqishtes së  vjetër (!!). Është fjala për një qytet të sunduar nga një tollovi e vërtetë, dhe rrugët ku ti ecën ndonjëherë mbyllen papritur, e përpara të del një grumbull plehrash (sic!).“

E në fund autori vijon me Malin e Zi e me Bosnjën.

Re.Pu.